Pemutus agih penuduk Dun bedau dikeaum

ASAJAYA: Gempung Parti Sarawak (GPS) bedau ngaga sebarang pemutus pasal agih penuduk Dun ungkup Pengawa Bepilih Besai Nengeri (PRN) enggau bakih parti Perikatan Nasional iya nya Bersatu.

Mandal Chairman Parti Pesaka Bumiputera Bersatu (PBB), Datuk Abdul Karim Rahman Hamzah madahka bisi aum pasal pekara tu tang pemutus penuh deka ditentuka ‘Ahli Majlis Tertinggi GPS’ ti diarika parti komponen GPS.

“Udah tentu bisi sekeda penuduk nyadi isu lebuh PRN. Ambika chunto, Dun Mambong sebedau tu SUPP bediri dia, tang diatu pengari rayat iya kaban parti PBB.

“Penuduk Krian suba diempu PKR tang pengari rayat nya udah merejuk ngagai Perikatan Nasional/Bersatu.

“Aku nadai ngembuan kuasa nyaut pekara nya. Pemutus nya deka ditentuka presiden parti komponen enggau chairman GPS,” ku iya ba aum pemberita pengudah bejadika Program Ziarah Belia Asajaya 2021 di Opis Pelilih Menua Asajaya ditu, ensana.

Ku Abdul Karim, agih penuduk PRN ti deka datai mega bisi dirandau ba palan bukai.

Taja pia, iya meri jamin GPS nemu baka ni mutarka penanggul ngagihka penuduk tu ila.

Ku iya, GPS mujur mutarka penanggul agih penuduk nya baka pengawa bepilih sebedau tu.

Suara Sarawak