Perintah Brunei nyaup M’sia mutarka pandemik

LAWAS: Pemanah kaul entara Perintah Malaysia enggau Menua Brunei Darussalam ngasuh sebarang kerejasama ulih dipejalai enggau nadai penanggul.

Sapit Sekretari Mendam Opis Menteri Pengerai Menua Brunei Darussalam, Dr. Zulaidi Abdul Latif madahka Perintah Brunei nyuaka pemeri kereban berubat ngagai Perintah Malaysia ngambi ulih nagang pengerekai igi penyakit Covid-19.

Ku iya, pemeri nya nyadika kelai pemanah kaul entara kededua menua lalu dikena nyaup pangan diri mutarka penusah dibai pandemik nya.

“Nyadi pengari Perintah Brunei, endang udah nyadi tanggung pengawa kami nyaup menua sesepiak ti benung tusah.

“Pemeri tu ngambika bisi diguna raban perubat ba Sarawak, Sabah enggau Wilayah Persekutuan Labuan,” ku iya.

Dr. Zulaidi mansutka jaku nya lebuh simbolik nyuaka pemeri diatur ba Pelaman Pos Pematau Labu, Temburong enggau Pos Pematau CIQS, Mengkalap, Trusan ditu tadi.

Perintah Malaysia nengah Opis Menteri Pengerai Malaysia (KKM) ti diarika Sapit Direktor Opis Pengerai Nengeri Sarawak Dr. Azliee Ayub.

Sepuluh buah mesin vantilator enggau 200 kereban nyaga pengelikun (PPE) berega RM1.7 juta udah diterima sehari nya.

Kereban nya deka diagih ngagai tiga wilayah iya nya Sarawak, Labuan enggau Sabah, lalu pengawa dilempai ba KKM Pelilih Lawas.

Suara Sarawak