Pos matau tetap deka ditumbuh di Sungai Putong enggau Temiang engkeman

SIMANGGANG: Perambu numbuhka pos matau tetap di Sungai Putong enggau Temiang nya endang engkeman dikena nagang kampar (Pati) tama ngagai menua tu.

Menteri Muda Pengintu Pengelantang Komuniti, Datuk Francis Harden Hollis nyemetak madah, nya dua ari tiga palan ke patut dikemerat.

“Palan keterubah ba Kampung Titikah. Enti nitih Palan pematau Pasukan Gerakan Am (PGA) ke diatu patut didiri ba belakang rumah panjai laban semak agi enggau adan menua sepiak.

“Perintah dikearap ulih numbuhka pos matau tetap di Sungai Putong enggau Kampung Temiang dudi hari dikena nyaga adan menua kelimpah pengawa nyendiaka permit sementara mansa adan menua,” terang Harden.

Adun Simanggang mansutka jaku nya lebuh ngatur pejalai ngabas seraya gawa ngagai Indu Opis Polis Pelilih (IPD) Sri Aman, ditu tadi.

Terang iya, perambu tumu beguna amat ngambi meri timbal ngagai menua sepiak ke merambu deka mindahka indu mengeri sida ngagai Kalimantan Barat.

“Enti pekara nya nyadi nyata, peranak menua luar deka majak tama ngagai menua kitai Sarawak.

“Kebuah pia laban baka taklimat dikenatai Tuai Unit Khas Pelilih Sri Aman, ASP Jorasan Chawat madahka mayuh jalai chit ke ngujungka kitai napi penusah nagang kampar ari tama ke menua tu,” ku Harden.

Iya mega madah, kampar tama ke menua tu laban gawa ba sektor ladang enggau pengawa berumah.

“Kala mega orang madah ngagai aku, sida kala tepedaka kampar tu tama nengah jalai chit laban deka meli barang pemakai kelimpah enggau kebuah ngabas bala sida ditu,” terang iya.

Penatai Harden dikelaluka Tuai Polis Pelilih Sri Aman DSP Bingkok John sebedau Tuai Unit Pansik Penyalah Narkotik Pelilih Sri Aman, ASP Herman Rakey meri taklimat pasal isu dadah lalu ASP Jorasan meri penerang pasal isu adan menua enggau kampar.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak