Raban gawa ba PPV nerima pemeri asil kebun

BINTULU: Sepenyampau 169 kambut asil kebun diberi ngagai raban terabai komuniti sereta volunteer ke gawa ba Palan Meri Vaksin (PPV) Dinner World Bintulu nengah Program Peladang Prihatin Sarawak.

Pemeri nya diatur nengah Opis Betanam Betupi Bagi Menua Bintulu enggau Serakup Orang Bumai Pelilih Menua (PPK) Bintulu nya kelai ngenang jasa enggau pengelelak raban terabai komuniti nagang Covid-19.

Pemeri nya udah disuaka Penulung Pegawai Opis Betanam Betupi Bagi Menua Bintulu, Anggang Jimbun ngagai Pegawai Opis Pengerai Bagi Menua Bintulu Dr Melvin Chung Hsien Liang.

Kaban Parlimen Bintulu Dato Seri Tiong King Sing mega bisi datai ngemataka pengawa nya.

Asil utai ari kebun nya deka disua ngagai raban terabai komuniti enggau volunteer ke gawa ngemujurka Program Betuchuk Vaksin Covid-19 Nasional (PICK) di PPV Dinner World.

Pia mega, pemeri nya mega udah disadung ngagai staf enggau volunteer ba PPV Palan Lumba BDA Kidurong enggau PPV Balai Raya Sebauh kena Hari Satu enggau Hari Dua tu tadi.

Nambahka nya, pemeri nya mega deka disua ngagai PPV Balai Sri Kenyalang Universiti Putra Malaysia Kampus Bintulu enggau PPV Balai Lumba Tatau enda lama agi.

Program Peladang Prihatin Sarawak nya entara inisiatif di baruh Program Meli enggau Nyadung Asil Kebun ari PPK enggau dipejalai Opis Betanam Betupi Sarawak ngena agih belanja ari Perintah Sarawak.

Program Meli enggau Nyadung Asil Utai Tanam ari PPK tu udah dipejalai Opis Betanam Betupi Sarawak kenyau ari taun 2020 lebuh Atur Mindah Betagang (PKP) ketegal pandemik Covid-19.

Nengah program tu, PPK meli asil kebun lalu diberi ngagai raban terabai komuniti di PPV.

Chara tu dikena mantu pekebun ke enda ulih nyual asil kebun maya pandemik Covid-19 lalu PPK meli utai nya dikena mantu nambahka penatai pemisi sida.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak