RM8.5 juta diagih Unifor ngagai rumah sembiang

KUCHING: Unit Pekara Pengarap Bukai (Unifor) di baruh Opis Kepala Menteri berengkah ngagihka geran ninting taun penyampau RM8.5 juta ngagai sekeda rumah sembiang, ditu kemari.

Sebuah kuil China, dua buah chapel enggau sebuah gerija entara penerima tumu bantu nya.

Sapit Kepala Menteri ke mega Menteri Bekuasa Unifor, Datuk Amar Douglas Uggah Embas madah, rumah sembiang ti nerima geran tu baka Kuil Mazu, Kuching (RM1.5 juta), Chapel St Anthony, Mukah(RM2 juta), Chapel Roh Kudus, Permyjaya, Miri (RM1 juta) enggau Gerija St Barnabas, Taman Tunku, Miri (RM2 juta).

“Pia mega, geran RM2 juta mega diberi dikena nyeleti jalai nuju Pendam Kristian Kuala Setiam di Bintulu.

“Geran nya udah disua ngagai Adun enggau Kaban Parlimen tauka pengari ba kandang menua nya, ditu kemari,” ku Uggah nerang.

Uggah madahka pengawa ngagihka geran kedua nya penyampau RM17 juta.

Pia mega, iya ngelalau semua pengari ti dipilih nerima geran nya terus nitihka Atur Pengawa Standard (SOP) dikena nyeliahka kes berampit Covid-19.

“Taja suah bejalai ngabas pengelantang rayat tang pengawa nerima vaksin Covid-19 mega beguna dikena nyaga diri,” ku iya nyemetak madah.

Ku iya, peranak ba Sarawak chukup untung laban Perintah Sarawak keran deka nagang pandemik Covid-19 lebuh bejalaika program betuchuk vaksin.

Sama datai Direktor Unifor Richard Lon enggau Presiden Gempung Serakup China Sarawak, Datuk Richard Wee.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak