Sama besukung awakka bisi asil

KUCHING: Music Right (Sarawak) nya siti entiti ti nyaga hak lagu enggau musik di menua tu ke lebih spesifik pasal royalti lagi. Kitai di Sarawak baru udah numbuhka Music Right Sarawak Berhad (MRSB) ti nyaga royalti lagu etnik Sarawak.

Siku penanyi Iban di Sarawak, Isa Lee madah enti dulu suba royalti dijaga, dikemata sereta digumpul sida ari Semenanjung Malaysia sebedau dibagi ngagai penanyi, komposer, penulis leka lagu, kompeni rikoding enggau ke bukai di Sarawak.

“Diatu Armada Anak Sarawak (Aras) ngaga siti gerempung ngelumuka semua anak seni Sarawak nengah MRSB awakka royalti lagi Sarawak diadu tauka dijaga orang Sarawak empu.”

“Kitai ngasaika kita ulih ngereja tu enti semua semua raban artis bela meri sukung nyadi kaban ARAS enggau MRSB. Pia mega terima ngagai siku dua menteri ti udah nunjukka sukung diri ba pekara tu,” ku iya madah ngagai Suara Sarawak, kemari.

Nya alai, ngena peluang tu aku meransang semua anak senu Sarawak enda ngira bansa bela nyaguka Aras tauka MRSB awakka lagu kitai bisi mai asil ti patut diterima sida, ku tandu Isa.

“Ngelama tu kitai mayuh ngaga lagu, lebih agi lagu Iban tang nadai tentu asil laban ukai semua ulih nerima royalti.

“Tu mih peluang anak seni Sarawak nunjukka asil karya sida deka nerima balas tauka pampas ti patut nitih enggi sida di Semenanjung,” ku iya.

Suara Sarawak