Seliah ngaga pinjau ari ahlong tegal PKP

JULAU: Kaban Parlimen Julau, Larry Sng nangkan mensia mayuh anang sesekali nguji minjau duit ari ahlong taja sida suntuk belanja ketegal Atur Mindah Betagang (PKP) jam ke diatu.

Ku iya, pekara nya dikena nyeliahka sida napi penanggul ke lebih berat lebih agi enti enda tebayarka duit jali nya ngujungka sida digiga ahlong.

“Apin lama ke udah, aku bisi dilawa siku lelaki ari Kapit ke madah diri udah minjau jali ari ahlong RM5, 000. Ketegal PKP, iya madah diri nadai gawa lalu enda ulih tebayarka jali nya ngujungka iya digiga raban orang ke udah meri jali nya.

“Lelaki nya bisi tiga iku anak mit sereta bisi penanggul runding (OKU). Diatu iya nyau enda nemu jalai ke patut digaga nyentuk madah diri merambu deka munuh diri,” ku iya madah nengah sebengkah penerang.

Kenu ku Larry, iya udah meri sepenyampau wang dikena nayup lelaki nya mayar utang nya.

Suara Sarawak