Semina Agong bisi kuasa nginsil ordinan darurat

KUALA LUMPUR: Yang di-Pertuan Agong Al-Sultan Abdullah Ri’ayatuddin Al-Mustafa Billah Shah ensiban enggau penerang ba Parlimen kena Hari Satu tu tadi pasal perintah udah nginsil semua Ordinan Darurat ke apin dikemendar iya.

Nampung penerang ari Bernama dia Datuk Pengelola Bijaya Diraja Istana Negara, Datuk Ahmad Fadil Shamsuddin madahka, Agong chukup ensiban enggau penerang ke udah dibantai Menteri ba Opis Menteri Besai (Parlimen enggau Undang-Undang)Datuk Seri Takiyuddin Hassan sereta Luyar Menua, Tan Sri Idrus Harun madahka perambu nginsil semua Ordinan Darurat dipejurai ba Parlimen ungkup pengawa nyimpul enda dipejalai.

“Agong nyemetak madahka Menteri di Parlimen kena 26 Julai nya salah lalu udah ngasuh Kaban Parlimen saru penemu,” ku Ahmad Fadil nerang, ditu kemari.

Iya madah, Seri Paduka nyemetak madah sida berumban nganjung peminta nginsil semua Ordinan Darurat kena Hari Satu tu tadi lalu enda dipejurai ba Parlimen.

Ahmad Fadil madah, Al Sultan Abdullah madahka penerang ke udah dibantaika nya besibil sereta ngasuh Kaban Parlimen di Parlimen saru penemu ukai semina puntan bebasaka undang-undang dalam Rukun negara tang enda bebasaka kuasa Seri Paduka ke nyadi Tuai Pemegai Menua baka dipasuk dalam Konstitusyen Perintah Besai.

Aum Parlimen

“Agong nyemetak madahka semua orang mesti nitihka atur enggau undang-undang dalam pemerintah Raja Berperlembagaan enggau sistem Demokrasi Berparlimen bepelasarka prinsip pemesai kuasa kunstitusuen menua.

“Perkara 150(2B) dibacha enggau Perkara 150(3) Perlembagaan Persekutuan terang bendar mantaika kuasa ngubah enggau nginsil Ordinan-Ordinan Darurat bepanggai ba Agong,” terang iya.

Iya madah, Seri Paduka nemu iya ngaga pemutus nitihka sanding penemu Jemaah Menteri baka dalam Perkara 40(1) Perlembagaan Persekutuan tang iya ke nyadi Tuai Pemegai Menua ulih ngelara tauka meri sanding penemu nyema bisi orang enda bejalaika pengawa enda nitihka konstitusyen enggau pematut.

Ahmad Fadil madah, Yang di-Pertuan Agong meri terima kaish ngagai perintah laban bejalaika Aum Parlimen berengkah Hari Satu tu tadi nitihka sanding penemu Raja-Raja Melayu dalam Randau Khas ke diatur kena 16 June tu tadi.

Ku iya, Seri Paduka minta Kaban Parlimen semampai ngemeratka pengelantang rayat enggau menua ba Aum Parlimen ke benung dipejalai dikena ngiga chara mutarka bemacham penanggul ditapi rayat enggau menua maya pandemik tu.

“Seri Paduka mega minta rayat sama besampika menua kitai likun enggau diseliah ari sebarang penusah sereta igi penyakit Covid-19 tu ulih pukas enggau lengkas,” terang iya baru.

Suara Sarawak