Senapang ikan tekachit kena belakang

KANOWIT: Siku lelaki beumur 25 taun benung ngenatka pemedis dianjung berumban ke wad emejensi, Sepital Kanowit urung pukul 9.12 malam tadi pengudah besi senapang ikan checukak lekat ba belakang punggung iya.

Nitihka penerang saksi, iya empu enda nemu baka ni senapang ikan nya tau tekachit kediri lebuh tudah benung nyelam deka nimbak ikan.

Bekau ari penusah nya, raban Bomba enggau Penyah Penusah (BBP) Kanowit datai ngesah pengudah nerima kangau sereta netak besi senapang ikan nya ngena ‘bolt cutter’.

Udah nya, tudah terus ditaban ke berubat ngagai Sepital Kanowit sebedau dibai ngagai Sepital Sibu. Naka berita tu ditulis, tudah ti kena timbak senapang ikan nya diripotka nadai apa nama.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak