Staf JPJ gawa deka ditambah pengudah ninga sebana ari mensia mayuh

KUCHING: Opis Perengka Pengangkut Darat (JPJ) Sarawak deka nambahka pengereja pengawa sida ari 50 peratus ngagai 60 peratus iku gawa bekau ari mayuh kompelin diterima ari mensia mayuh.

Menteri Perengka Pengangkut Datuk Lee Kim Shin madahka mayuh timbal diterima sida kenyau beberapa minggu maya timpuh pengerekai Covid-19 bekaul pemar ditapi maya ngatur pengawa enggau JPJ.

“Berindik ari nya, sebuah aum dipejalai aku enggau Penyanding Penemu JPJ Dr Lawrence Tseu enggau tiga pemesai kanan ari JPJ Sarawak ti diuluka Direktor JPJ Sarawak ke baru Norizan Jili.

“Siti kompelin ti dipadahka iya nya slot semaya ti digaga nengah tali arus nengah facebook JPJ Sarawak jampat abis dalam beberapa minit aja laban kouta dibuka enda mayuh nitihka Atur Pengawa Standard (SOP) Kaunsil Pengelikun Menua (MKN),” ku iya dalam siti penerang media, kemari.

Nya alai, ku iya, ari aum nya JPJ Sarawak ngena inisiatif mutarka penanggul tu awakka enda meri penanggul ngagai mensia mayuh.

“Siti ari inisatif ti digaga sida iya nya nambahka penyampau slot semaya ari 70 ngagai 100 slot awakka ulih ngurangka awak nganti kelalu lama di kuanter.

“Udah nya, nambahka penyampau pengereja pengawa ari 50 peratus ngagai 60 peratus awakka transaksyen enggau tanggungpengawa enda kelalu berat lebuh napi orang mayuh kelebih agi di Bintulu.

“Kelimpah ari nya, bekau ari pengerekai Covid-19, JPJ Sarawak mega meri timpuh nyentuk 30 September 2021 ngagai semua deriba ngemaruka chukai jalai enggau lesen deriba sida,” ku iya.

Taja pia, ku iya, mensia mayuh diperansang ngemaruka insurans perengka pengangkut sida awakka ulih dilindung maya bisi Pengawa Ngempang Jalai (SJR) tauka lebuh diperesa raban penguasa.

Kim Shin meri terima kasih ngagai JPJ Sarawak enggau bala iya ti udah meri kerejasama penuh bekaul pekara tu nyengkaum ngemanahka servis ngagai rayat.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak