SV, NST bekerejasama enggau Yayasan Sarawak mantaika penerang beguna

KUCHING: Yayasan Sarawak nanggam kaul kerejasama enggau surat kabar menua iya nya Suara Sarawak (SV) enggau New Sarawak Tribune (NST) dikena ngerembaika penerang baru ngagai mensia mayuh.

Kerejasama nya nyadi pelasar Yayasan Sarawak meri enggau nerima penerang nengah pelasar ke manah agi.

“Kami nerima manah peluang nempa kerejasama tu ngambi mayuh agi orang nemu produk tauka sekularship disediaka kami.

“Pekara tu nipakka juluk Kepala Menteri Datuk Patinggi Abang Johari Tun Openg dikena nempa modal mensia nengah servis disediaka kami,” ku Direktor Yayasan Sarawak, Mersal Abang Rosli.

Mersal mansutka jaku nya lebuh nerima penemuai basa ari Suara Sarawak enggau New Sarawak Tribune betuaika Pegawai Eksekutif iya, Dr Jeniri Amir begulai enggau Tuai Pegawai Operasi Mohd Sardon Zainal ba opis Yayasan Sarawak di Jalai Santubong, ditu ensanus.

Mersal ngarapka kerejasama tu ulih mantu bejalaika pengawa ke diterima mensia mayuh.

“Ari perati ngelama tu, tusah aku nulak lebuh orang begunaka servis kami lalu nya kebuah, kami naka ulih meretika penanggul enggau berundingka chara mutarka penanggul nya seagi enda ngelanggar atur,” terang iya.

Ungkup penerang semua, Yayasan Sarawak ditumbuh dalam taun 1971 enggau deka ngintu pengerami makai taun ke-50 bulan Ogos tu.

Kenyau ari berapa taun ke udah, sida udah nyendiaka sekularship ngagai bala nembiak.

Entara sekularship ti disediaka iya nya Biasiswa Yayasan Sarawak Tun Taib (BYSTT); Yayasan Biasiswa Sarawak Tunku Abdul Rahman Sarawak (YBSTAR); Program Perubatan Khas; Biasiswa Tempatan Yayasan Sarawak (BTYS); Bantuan Pendaftaran Institusi Tinggi / Teknikal (HGipt) enggau ke bukai.

Suara Sarawak