Unifor ngagihka RM4.780 juta geran ngagai 35 buah organisasyen pengarap

KUCHING: Unit Pekara Pengarap Bukai (Unifor) ba baruh kuasa Opis Kepala Menteri udah nyuaka geran beungkus RM4.780 juta ngagai 35 buah organisasyen pengarap di menua tu.

Menteri megai tanggungpengawa Unifor Datuk Amar Douglas Uggah Embas madahka Perintah Sarawak udah ngagihka RM50 juta ngagai Unifor taun tu.

“Agih belanja tu dikena mantu nyeruri tauka ngemanahka rumah sembiang baka gerija, tokong enggau kuil.

“Kepala Menteri Datuk Patinggi Abang Johari Tun Openg udah nambah RM5 juta dalam mantu pengawa nyeruri rumah sembiang tu,” ku iya dalam siti penerang media, kemari.

Iya nandu, seminggu ti udah lalu Unifor mega udah meri RM8.5 juta belanja ngagai sebuah gerija, dua buah tepikong enggau sebuah kuil ungkup dikemanah.

Entara raban pengari penerima geran nya kemari, iya nya Menteri Kaunsil Kandang Menua enggau Pengawa Berumah Datuk Sri Prof Sim Kui Hian, Menteri Muda Betanam Betupi, Tanah Adat enggau Pemansang Kandang Menua Datuk Roland Sagah Wee Inn, Menteri Muda Perengka Pengangkut Datuk Dr Jerip Susil, Adun Tanjung Datu Datuk Amar Jamilah Anu, Adun Tasuk Biru Datuk Henry Harry Jinep, Adun Batu Kitang Lo Khere Chiang, Adun Serembu Miro Simuh enggau Adun Kedup Martin Ben.

Kelimpah ari nya, Menteri Muda Dagang Entarabansa enggau Industri, Terminal enggau Pemansang Orang Dagang Datuk Malcolm Mussen Lamoh enggau Menteri Muda ba Opis Kepala Menteri (Pekara Islam enggau DBKU ) Datuk Dr Abdul Rahman Junaidi sama nganjung pengari nerima geran.

Sama bisi datai ba pengawa nyuaka geran tu Direktor Unifor Richard Lon.

Suara Sarawak