Upah begelumu, sepuluh lelaki dikompaun RM1,500 siku

PADAWAN: Sepuluh iku lelaki bela dikompaun RM1,500 ketegal ngintu hari pengada enggau enda ngasika Atur Pengawa Standard (SOP), lemai kemari.

Tuai Polis Pelilih Padawan, Superintendan Aidil Bolhassan madah, sida dikompaun ba mua sebuah rumah di Skim Palan Pengentap Baru Stapok urung pukul 6.30 lemai.

Ku iya, rumah nya diperesa seraban Unit Pansik Penyalah Indu Opis Polis Pelilih (IPD) Padawan enggau dibantu raban ari Balai Polis Kota Sentosa.

“Lebuh meresa ba mua rumah, kami tepedaka sepuluh iku lelaki benung begempuru enggau duduk seraya makai serumpu lalu enda nyaga takah enggau pangan diri.

“Pengempu rumah nya ngaku pengawa sehari laban ngintu hari pengada petunggal iya,” ku iya nerang, ditu tadi.

Nambahka nya, semua sida dikompaun nengah Peraturan 17(1) laban ngereja penyalah ngintu hari pengada enggau nadai nyaga takah.

Suara Sarawak