SEB enggau SESB udah nyain sempekat kerejasama

KUCHING: Sempekat Pemereti Ati (MoA) Setuju Bekunsi Kuasa entara Sarawak Energy Berhad (SEB) enggau Sabah Electricity Sdn Bhd (SESB) ulih ngemansangka Sabah enggau Sarawak nyadi Grid Borneo ke besai agi.

Kepala Menteri Datuk Patinggi Abang Johari Tun Openg madah, kaul entara Sarawak enggau Sabah tu deka nempa kerejasama ke besai enggau meransang pengawa ngena kuasa karan ke meruan agi ungkup semua.

“Aku pechaya, kerejasama tu deka negapka pemanah kaul ke ditanggam kitai (Sarawak) enggau Sabah.

“Pekara tu mega deka nempa kerejasama rat ba mayuh bidang laban pemansang begulai nya chara kitai beranakka puku timpuh panjai ungkup kededua nengeri tu,” terang iya.

Abang Johari mansutka jaku nya lebuh ngemataka MoA entara SEB enggau SESB diatur chara online, ditu kemari.
MoU nya disain Tuai Pegawai Eksekutif SEB, Datuk Sharbini Suhaili enggau Tuai Pegawai Eksekutif SESB Datuk Ir Abdul Nasser Abdul Wahid.

Pengawa nya mega dikemata Kepala Menteri Sabah Datuk Seri Panglima Hajiji Noor, Chairman SEB Datuk Amar Abdul Hamed Sepawi enggau Chairman SESB, Datuk Seri Mahdzir Khalid.

Nambahka nya, Abang Johari keran dekaka Sarawak nyapai status menua maju manggai taun 2030 nengah bemacham strategi enggau inisiatif.

“Kitai nyingkang ngagai pemansang kuasa hidro ke ulih dikena baru ti tau meri kuasa ngagai Sarawak nengah Koridor Kuasa Ulih Dikena Baru Sarawak (Score) nyadi pemun pemansang ekonomi rama rayat.

“Pemansang kuasa ulih dikena baru nya ngulihka bekal kuasa nengah Tekat Ai Batang Ai, Murum enggau Bakun.
Iya nyemetak madah, rayat Sarawak deka bulih mayuh pengelebih laban kitai ngembuan kuasa hidro ke ulih dikena baru.

“Rakyat Sarawak mega bulih tarif nadai subsidi pemadu baruh di Malaysia sereta nyaup nyungkak ekonomi enggau nyendiaka pengawa puang lebuh beranakka puku ngagai Sarawak nengah sempekat meli kuasa pukal ungkup industri.

“Tu mega ulih nyendiaka bekal kuasa karan enggau bemacham infrastruktur ba menua pesisir sereta ngerumban pemansang ekonomi menua nengah industri hidro,” terang iya.

Abang Johari mega madah, inisiatif nya seriris enggau juluk Sarawak mansutka 15 peratus asil sektor kuasa ulih dikena baru ngambi dieksport tauka ungkup makit luar.

Sama datai Menteri Utiliti Datuk Seri Stephen Rundi Utom, Sekretari Perintah Sarawak Datuk Amar Jaul Samion enggau Luyar Besai Sabah Datuk Nor Asiah Mohd Yusof.

Suara Sarawak