10 mua Kaban Parlimen ari Sarawak dalam kabinet Ismail Sabri

KUCHING: Bisi 10 iku kaban parlimen (MP) ari Sarawak diberi pangku pengawa ba kabinet baru betuaika Menteri Besai ke-9 Datuk Sri Ismail Sabri Yaakob.

Empat iku MP udah dipadu nyadi menteri penuh lalu enam iku agi nyadi sapit menteri.

Tuai Whip Gempung Parti Sarawak (GPS) ti mega MP Petra Jaya Datuk Seri Fadillah Yusof agi mengkang mangku tanggungpengawa nyadi Menteri Kereja Raya ke alai pangku tanggungpengawa nyadi Menteri Dagang Dalam Menua enggau Pekara Penguna sereta Menteri Dagang Temuai, Seni enggau Main Asal mega mengkang dipangku MP Kapit Datuk Seri Alexander Nanta Linggi enggau Kaban Parlimen Batang Sadong Datuk Seri Nancy Shukri.

Berebak enggau nya, siti agi pangku pengawa menteri dalam rintai kabinet baru tu iya nya Menteri ba Opis Menteri Besai (Parlimen enggau Undang-undang) dipangku MP Santubong Datuk Seri Wan Junaidi Tuanku Jaafar.

Sebedau tu, Wan Junaidi nyadi Menteri Pemansang Dagang enggau Gerempung Kerejasama, tang pangku tanggungpengawa nya diatu diganti MP Tanjung Karang Selangor Tan Sri Noh Omar.

Kelimpah ari nya, empat iku kaban parlimen ari GPS ti di dichiri nyadi sapit menteri bisi berubah mimit.

Udah nya, MP Mukah Datuk Hanifah Hajar Taib dichiri nyadi Sapit Menteri di Opis Menteri Besai (Pekara Sabah enggau Sarawak) ke alai menteri ungkup portfolio tu dipegai Datuk Seri Panglima Dr. Maximus Johnity Ongkili.

MP Kanowit Datuk Aaron Ago Dagang agi mengkang megai tanggungpengawa nyadi Sapit Menteri Pengerai ll ke alai pangku pengawa menteri tu dipangku Khairy Jamaluddin Abu Bakar.

Nangkan nya, MP Lawas Datuk Henry Sum Agong dichiri nyadi Sapit Menteri Perengka Pengangkut mantu Datuk Seri Ir. Dr. Wee Ka Siong.

MP Limbang Datuk Hasbi Habibollah ke sebedau tu dichiri nyadi Sapit Menteri Perengka Pengangkut dichiri nyadi Sapit Menteri ll Menteri Pemansang Menua Pesisir ba baruh Datuk Seri Mahdzir Khalid.

Dua iku agi MP ari Bersatu mengkang mangku pengawa baka sebedau tu iya nya Kaban Parlimen Puncak Bornoe Datuk Willie Mongin nyadi Sapit Menteri ll Menteri Pengawa Bekebun enggau Komoditi ba baruh Datuk Zuraidah Kamaruddin sereta Kaban Parlimen Saratok Datuk Ali Biju nyadi Sapit Menteri Pengeluar Kuasa enggau Pengeraja Asal ba baruh Datuk Seri Takiyuddin Hassan.

Suara Sarawak