106,400 iku mujur divaksin ba Unimas

KOTA SAMARAHAN: Universiti Malaysia Sarawak (Unimas) seruran sedia mantu perintah dalam pengawa meri vaksin Covid-19 ngagai rayat di menua tu.

Mandal Kaunselor Unimas Datuk Dr Mohamad Kadim Suaidi madahka sida udah madahka pekara nya ngagai raban bekaul dalam proses meri vaksin.

“Kami besedia mantu ngena macham chara ti diperunding engkeman nyengkaum meri vaksin ngena chara mindah tauka program nyapai komuniti,” ku iya.

Mohamad Kadim bejaku munyi nya lebuh ditanya pemberita ba Program Angkat Sumpah Nembiak Palan Pelajar Pra-Universiti, Unimas di DeTar Putra ditu, kemari.

Ku iya, Unimas naka diatu udah mujur meri vaksin dos keterubah enggau dos ti kedua kena 23 Julai tu tadi.

“Sepemanjai timpuh program tu bejalai, kami udah mujur meri vaksin ngagai 106,400 iku penerima di sitak Kota Samarahan enggau Kuching.

“Aku temegah enggau pemujur tu laban nya siti chara pemadu manah raban Unimas ngelaban pengerekai Covid-19 ngujungka kami ulih mantu perintah ngemujurka Pelin Ngemanahka Menua (PPN),” ku iya.

Tandu iya, lebuh pengawa meri vaksin kena bulan June enggau Julai tu tadi dipejalaika, sida udah nganjung bas Unimas ngambi peranak menua awakka ulih dibai ngagai Palan Meri Vaksin (PPV) Unimas nerima vaksin.

“Tu program nyapai (outreach) komuniti ti diatur kami mantu sida,” ku iya.

Berebak enggau nya, iya madahka pengudah program nya, Unimas enda ulih bejalaika proses vaksin agi laban agi nganti pemutus ari Komiti Pengereja Pengawa Khas Imunisasyen Covid-19 (CITF) Sarawak.

“Taja pia, kami endang udah besedia deka mantu proses meri vaksin tu, lalu pekara tu udah dipadahka ngagai sida,” ku iya madah nyemetak.

Ungkup rekod, PPV Covid-19 Unimas entara PPV pemadu besai di Sarawak ti berengkah dibuka kena 14 June nyentuk 23 Julai tu tadi.

Suara Sarawak