115 penerima di Kpg Rajang Baru bulih taba berumah nengah SPK

SARIKEI: Skim Nangkir Genturung Pendiau (SPK) siti ari pengeransing Perintah Sarawak dikena nyungkak pemansang di menua pesisir ke pemaik enggau pengelantang rayat.

Pengawa tu mega sebengkah chara dikena nyendiaka taba rumah enggau perengkaguna ti ulih kena nangkup peminta ketegal rayat ke majak nambah lebih agi sida ke kurang penatai pemisi.

Pengawa tu dipandang nengah pengawa nyuaka sepenyampau 115 Surat Pemendar ungkup SPK Kampung Rajang Baru, Tanjung Manis.

Pengawa tu udah dikemujurka Menteri Muda Pemansang Mengeri Enggau Pengereja Asal, Datuk Len Talif Salleh ngagai sida ti nerima bantu, kemari.

Pengawa nyuaka surat SPK tu kelai Perintah Sarawak semampai mendingka peminta peranak menua pesisir kelebih agi ti kena bungkur projek pemansang ke pemaik mensia mayuh dudi hari,” ku iya maya dirandau raban pemberita pengudah pengawa nya.

Adun Kuala Rajang nya mega madahka, projek Skim Gempuru Baru (SPS) enggau SPK dikena nyendiakla taba genturung kelebih manah, likun sereta bisi perengkaguna ti chukup baka jalai raya, sistem parit, bekal ai enggau karan.

Ukai semina tu aja, perintah GPS mega ngurangka deka rega premium sepenyampau 50 peratus kena taba genturung di semua SPS enggau SPK sereta enda lebih RM2,500 ungkup siti lot.

“Semua tulung tu diatur kena mantu ngurangka penusah rayat ti kurang penatai pemisi nengah skim dikena mutarka penanggul bebayarka premium tanah. Projek tu endang meri untung ngagai rayat kelebih agi di Kampung Rajang.” ku iya.

Tandu iya mega tu mandangka semua ti udah diatur Perintah GPS deka dipejalaika kena meri penyenang ngagai rayat.

Berebak enggau nya, iya ngarapka orang ba genturung nya ti udah bulih taba kediri empu deka ngentak rumah alai sida deka diau kena menuhka tuju asal nyendia skim SPS enggau SPK.

“Aku berasai gaga enggau meri terima kasih ngagai Opis Tanah enggau Survei ke semampai bebendar ngemujurka projek tu,” ku iya maya tu.

Sama bisi enggau ngulu pengawa tu Residen Bagi Mukah Hamdiah Bakir, Penguasa Tanah enggau Pansik Bagi Mukah Emmy Zurina Omar, Pengari Pegawai sitak Tanjung Manis Ismail Kasah enggau Pemancha Morshidi Moris.

Suara Sarawak