Anang guai mai anak sesegau sebelah pasar

SIBU: Apai Indai di Sibu dilalau anang guai mai anak sida ke beumur baruh ari 17 taun makai di kedai tauka sesegau sebelah pasar.

Jaku tangkan nya dipansutka Chairman Opis Kunsil Sibu (MPS) Kaunselor Clarence Ting Ing Horh maya dirandau raban media sepengudah ngabas proses vaksinasyen di Makit Besai Sibu, kemari.

Ting madahka tu beduduk ari nembiak beumur baruh ari 17 taun bedau nerima vaksin Covid-19.

“Seriris enggau inisiatif ti dipejalaika MPS di Sibu ‘Bedau Divaksin, Enda Tau Tama’, sida nya bedau dikemendar nerima vaksin di menua kitai.

“Pia mega, atur ti deka dipejalaika tu ungkup orang beumur 17 taun ke baruh laban sida bedau divaksin,” ku iya.

Ting madahka, sebedau tu nembiak ti beumur 12 taun ke baruh enda dikemendarka tama ngagai palan dagang di Sibu nyengkaum kedai, palan pemakai enggau Makit Besai Sibu.

Iya nerang silik pekara nya dituju ngagai raban ke beumur 17 taun ke baruh enda dikemendarka awakka orang ti ngempu palan bejual nya seruran nitihka jaku tangkan nya.

Taja pia, Ting madahka iya berasai ensiban laban agi bisi apai indai dipeda mai anak sida raun ke pasar tauka makai di palan pemakai taja varian Delta Covid-19 ditemu agi mengkang ngerekai.

Suara Sarawak