Arkitek Sarawak Champion Pekit Seni Begunan Langit

KOTA SAMARAHAN: Dua arkitek ari Sarawak, Jascinta Yii Kiueng enggau Alan Kueh dipadu nyadi champion Pekit Seni Begunan Langit.

Jascinta enggau Alan pengemeran arkitek seni begunan ke gawa ba Kuching enggau Melbourne nerima perais mata duit sepenyampau RM100,000.

Jascinta madahka iya enda nyangka bulih nyadi champion dalam pekit tu laban ngasaika diri agi baru dalam dunya seni begunan.

“Ari semua pemekit, aku agi baru nya aku enda nyadang diri ulih nyadi champion, tang aku berasai gaga enggau pengulih tu.

“Aku meri terima kasih ngagai bakih aku Alan, sayau iya enda ulih datai kitu ketegal bisi pengawa di Singapore, laban iya udah meri aku buah runding ngelangkar sebuah begunan ti chukup manah,” ku iya.

MANAH…Abang Johari nyain kelai gambar begunan 18 ringkat ke bulih gelar champion ba Pekit Seni Begunan Langit di Menara HSL ditu, kemari.

Iya bejaku munyi nya, lebuh ditanya pemberita pengudah nerima perais champion Pekit Seni Begunan Langit ari Kepala Menteri Datuk Patinggi Abang Johari Tun Openg di Menara Hock Seng Lee (HSL) Berhad ditu, kemari.

Tandu Jascinta, tim seduai iya endang bebendar bekerejasama lebuh ngambi bagi ba pekit tu.

“Ngelangkar begunan tu sigi siti pekara ti mar laban pengeluas tanah mit, tang kami nguji ngubah langkar kovensional ngambika langkar begunan di Sarawak dikelala menua luar.

“Alan madahka, langkar kami patut mungkur peminta rama enggau rampa menua iya nya ngaga ruang awakka orang ti datai ngasaika diri diau dalam palan gadung enggau gerai.

“Nya alai, begunan kami dilangkar lebih ngagai utai tumbuh bechura gadung baka ladang di mengeri ba tingkat pemadu atas enggau ladang sayur endur kitai meransang mensia mayuh nanam sayur kediri awakka ulih dijual ba pasar,” ku iya.

Iya andalka langkar nya ila deka ulih digaga taja pan mar.

“Langkar tu enda muntang digaga laban begunaka ungkus ti besai.

“Taja pia, nadai pekara enda ulih diputarka, laban aku ngarapka begunan tu ulih digaga ba maya ti deka datai,” ku iya.

Penuduk lumur dua pekit tu pulai ngagai Lee Shyan Luen enggau Justin Lee mai pulai perais mata duit RM50,000.

Lalu, ba penuduk lumur tiga pulai ngagai Hung Sing Ing mai pulai perais mata duit RM25,000.

Dua agi pemekit bukai iya nya pesereta ba penuduk lumur empat enggau lumur lima dipenggi Moh Ung Tai enggau Wong Leong Hong.

Seduai sama mai pulai perais mata duit RM10,000.

Suara Sarawak