Atur Darurat patut dititih ke pemaik rayat

TELAGA AI: Pemutus Proklamasi Darurat ungkup Sarawak dilanjarkan baru ngagai taun baru deka dititih ungkup pemaik rayat.

Adun Pantai Damai Datuk Dr Abdul Rahman Junaidi madahka gerah ari Yang di-Pertuan Agong Al-Sultan Abdullah Ri’ayatuddin Al-Mustafa Billah Shah nya dituju ngagai Sarawak baka ti ditukuka ba Kunstitusyen Perintah Besai Pekara 150 Fasal 1.

“Dalam pekara tu Agong madahka darurat deka disambung ba Sarawak berengkah 2 Ogos 2021 nyentuk 2 Februari 2022, tu mai reti Sarawak deka ba baruh atur Darurat enam bulan agi.

“Nya alai, nengah gerah ari Agong nya, Kunsil Nengeri Sarawak (Dun) Sarawak dilanjarkan enam bulan agi pengudah darurat keterubah padam kena 1 Ogos,” ku iya.

Rahman Junaidi bejaku munyi nya lebuh ditanya pemberita ba Program Nyuaka Bantu Barang Pemakai ngagai peranak Kampung Telaga Ai ti benung bejalaika Atur Mindah Betagang Dipekul (PKPD) ditu, kemari.

Ku Menteri Muda Bekal Ai nya madah, pemutus tu patut dititihka laban seriris enggau jaku Kepala Menteri Datuk Patinggi Abang Johari Tun Openg iya nya, Pengawa Bepilih Besai Nengeri (PRN) enda deka ulih diatur nyema dua pekara agi bisi nekul.

“Ku Kepala Menteri pekara keterubah iya nya nyema rikod kes Covid-19 ninting hari agi tinggi.

“Diatu endang kes Covid-19 agi tinggi, urung 300 ngagai 500 kes, sigi enda engkeman endur ngatur PRN.

“Kedua enti menua kitai bedau bulih imuniti beraban, laban perintah nengah kerejasama Komiti Penyangga Penusah Nengeri (JPBN) benung chakah meri vaksin ngagai 2.2 juta peranak menua tu,” ku iya.

Taja pia, iya andalka PRN deka ulih dipejalaika nyema kes nurun pengudah tembu 2 Februari 2022 ti deka datai.

“Aku pechaya PRN ulih dipejalai dalam kandang beberapa bulan ti deka datai.

“Aku enda ngasaika tu siti pengelebih ngagai pengari rayat laban kami ari Gempung Parti Sarawak (GPS) endang seruran bejalaika pengawa mantu rayat, nya endang udah tanggung pengawa kami,” ku iya.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak