Atur ditendur, tang ingat SOP

KUCHING: Perintah Besai nendurka atur kuarantin enggau pejalai neresa pelilih menua tauka nengeri ngagai orang ti udah genap nerima vaksin Covid-19 ba serata menua ulih diguna ba semua nyerumba Pelin Ngemanahka Menua (PPN) berengkah 10 Ogos tu.

Menteri Besai Tan Sri Muhyiddin Yassin madahka pekara tu nyengkaum rayat menua enggau ukai rayat menua ti pulai tauka tama ke Malaysia tang udah nerima dos vaksin penuh ti dikemendarka bejalaika kuarantin di rumah enggau diasuh nitihka Atur Dipatau ari Rumah (HSO) Digital.

“Kelimpah ari nya, orang melaki bini ti jauh tang udah nerima vaksin penuh mega dikemendarka neresa pelilih menua tauka nengeri betemu enggau pangan diri.

“Pia mega, apai indai ti udah nerima vaksin penuh mega dikemendarka neresa pelilih menua enggau nengeri betemu enggau anak sida ke baruh umur 18 taun,” ku iya nengah Pesan Khas ke ditabur terus ba RTM, kemari.

Iya nerangka, pekara tu dikemendarka ungkup rayat ti udah nerima vaskin penuh iya nya vaksin Pfizer, AstraZeneca enggau Sinovac (dua dos) lalu sida mesti udah ngelui 14 hari ari tuchuk ti kedua.

“Bagi vaksin ti semina siti dos aja iya nya Johnson & Johnson enggau CanSino, orang nya mesti udah ngelui 28 hari ari maya iya dituchuk baru tau ngena atur tu.

“Bagi sektor rama, pejalai neresa pelilih menua dikemendarka ngagai orang ti udah tembu vaksin tang sida mesti nunjuka setipikit tembu vaksin maya mansa Pengawa Ngempang Jalai (SJR),” ku iya.

Iya mega madahka, ngagai apai indai ke udah tembu vaksin ti deka mai anak sida beumur 17 taun ke baruh makai dalam kedai, sida mesti nitihka Atur Pengawa Standard (SOP) enggau terit.

Taja pia, iya ngelalau mensia mayuh enggau pengempu premis kedai makai seruran nitihka atur SOP ti terit baka meresa setipikit vaksin Covid-19 penuh orang ke tama enggau nyendiaka ruang makai ti ngembuan pejalai angin ti manah.

Ba pekara ti kepenudi, Muhyiddin madahka aktiviti dagang temuai dalam menua mega dikemendarka ngaul homestay enggau hotel.

“Pengempu homestay enggau hotel mesti nentuka orang ti tama ngagai permis udah divaksin penuh sereta nunjukka setipikit vaksin Covid-19 sida.

“Semua pemendar ti dipadahka aku tu deka berengkah dikena 10 Ogos tu Hari Dua ke alai semua penerang tu deka dikeluarka Kaunsil Pengelikun Menua (MKM) enda lama agi,” ku iya.

Suara Sarawak