Bisi 8.25 juta rayat udah genap divaksin

KUCHING: Bisi 8.25 juta orang rayat menua tu udah genap nerima tuchuk dua dos vaksin Covid-19.

Menteri Besai Tan Sri Muhyiddin Yassin madahka kenyau Program Imunisasyen Covid-19 Nasional (PICK) diatur kena 24 Februari nyentuk 6 Ogos bisi 23.6 juta dos vaksin udah diberi ngagai Malaysia.

“Ari penyampau nya, bisi 15.35 juta udah nerima dos vaksin keterubah ke alai 8.25 juta udah genap nerima dua dos vaksin.

“Kenyau 12 Julai tu tadi, tikas vaksinasyen ninting hari manggai 400,000 dos nyau deka ninting hari enggau keterubah iya ngelui ari 500,000 dos kena 22 Julai apin lama,” ku iya nengah Pesan Khas ke ditabur kemari.

Ku iya, pemutus ngemendarka pekara kuarantin enggau pejalai neresa pelilih menua tauka nengeri ngagai mensia mayuh digaga bejimat laban ngerunding pekara pengerai rayat.

“Pemutus meri pemendar udah tentu deka meri risiko ngagai penambah kes Covid-19 ninting hari, tang perintah nguna peluang pengudah rayat nerima vaksin ungkup pekara pengerai runding enggau tubuh sereta aktiviti ekonomi sida.

“Rayat ke udah genap nerima vaksin bisi penegap ba pengering tubuh ari dirampit Covid-19 sereta ulih ngurangka rampit kes positif Covid-19 urung 50 peratus,” ku iya.

Tandu Muhyiddin, dalam timpuh enam minggu ke udah lalu, kes tama ba wad enggau unit sakit raya (ICU) bisi nurun ba Sepital Sungai Buloh ungkup rayat ke beumur 60 taun ke atas.

“Gaya tu nunjukka vaksin ti diberi ngagai raban orang tuai besai ba renggat kedua PICK udah ngayanka pangka positif ari sukut pengerai.

“Baka nya mega kes berampit ti nyadi ngagai pengereja pengawa Opis Pengerai Malaysia (KKM) ti udah nurun laban nadai kes agi begunaka bantu oksigen kenyau PICK dipejalaika berengkah 24 Februari tu tadi,” ku iya.

Suara Sarawak