Buah binjai agi mayuh di Dalat

MUKAH: Buah Binjai tauka buah Binyuk (jaku Melanau) ba nama saintifik iya dikumbai Mangifera Caesia entara buah kampung ti jarang dipeda nembiak rebak baru.

Buah Binjai tu bisi bida ari segi pemesai, churak kulit sereta ngembuan asai ti manis nyema udah mansau lalu sitak Dalat entara menua ti seruran bisi buah tu.

Buah tu siti ari buah ti tumbuh di kampung tauka endang ditanam di kebun buah ba bagi menua Mukah sereta deka bebuah nitihka musin.

MANIS..Tiga igi buah binjai berega RM10 ngagai RM12 setumpuk.

Siku pedagang burger enggau buah, Dayang Marharmah Awang Ayuh ari Kampung Bungan Besar, Dalat, 43 maya dirandau di Kampung Kuala Lama ditu madahka, buah tu nyamai digiga ba kampung lalu ngembuan asai masam (agi puda) sereta manis (enti udah mansau).

Buah sereta kulit berchurak coklat lalu isi iya ti berchurak burak tu dijual enggau rega RM10 setumpuk iya nya sepenyampau tiga ngagai empat igi bagi siti tumpuk.

“Buah binjai taja masam tang nyamai diempa ulam enggau sambal belachan tauka dipanduk asam pedas enggau digaga nyadi karam,” ku iya maya dirandau.

Taja pia, ku iya mayuh agi penguna ti diau di menua pesisir bedau nemu pemanah sereta penyamai lauk enti dipanduk enggau buah binjai tu.

“Orang ti meli tu mayuh agi meli buah tu iya nya orang tuai laban sida lebih ngelala buah tu,” ku iya.

Dayang madahka, buah tu pansut setaun sekali tauka dua taun sekali tu tang jarang dikerinduka rebak baru laban kelalu masam tauka jarang dipeda sida.

“Bisi orang ti meli buah tu ari aku enda kala makai tauka meda buah tu.

“Aku deka ngasuh sida nguji nyepi buah tu lalu sida nemu buah tu endang lunak sereta ngembuan asai ti nyamai,” ku iya.

Ku iya nya, iya madah asil bejual buah binjai tu enda berapa mayuh laban besemekih enggau raja buah ti bukai iya nya buah Dabai, Sibau, Sikup ti nerima mayuh peminta.

Suara Sarawak