Centexs Mukah deka dibuka ngagai nembiak menua luar

MUKAH: Palan Penyulut Teknikal Sarawak (Centexs) Mukah deka dibuka ngagai nembiak luar menua dikena ngerembaika bungkur kaul entarabansa.

Kepala Menteri Datuk Patinggi Abang Johari Tun Openg madahka palan penyulut tu ukai semina dibuka ngagai nembiak menua tu aja tang dibuka ngagai menua luar dikena negapka kaul entarabansa pengudah nembiak tembu belajar ditu.

“Ambika cunto, bisi nembiak ari menua Indonesia kala belajar ditu, lebuh iya udah pulai ke menua iya empu, kitai ulih ngasuh iya bejual produk ari menua tu din.

“Rayat Sarawak empu semina 2 juta lebih aja, nya alai pekara tu mesti besambung ngambika nembiak ti belajar ditu ulih besilih penau, kaul ti tegap enggau meri pemaik ngagai kitai,” ku iya maya bejadika Centexs Mukah ditu, kemari.

Ku iya, nembiak mesti ngembuan runding ti panjai awakka ulih bekunsi penemu, penau enggau besilih chara idup dalam pelajar ngambika nembiak ti pansut ari palan tu ila betikas dunya.

“Juluk ati Sarawak deka nyapai menua maju ba taun 2030 ulih diayanka ari pekara tu. Nya alai, Sarawak sanggup meranakka puku dalam palan latih tu ngambika orang ari luar pan ulih belajar ditu mega.

“Ba pengujung iya, kitai deka ulih ngeluarka raban nembiak ti manah ba teori enggau praktikal ke alai lebuh sida keluar semua penau tu endang balat diguna dalam industri,” ku iya.

Kelimpah ari nya, Abang Johari madahka penau enggau peneleba dalam teknologi mega ulih meri pengelebih ngagai penatai pemisi.
“Nengah penau enggau peneleba ti diambi belajar ari palan penylut tu, sida ulih teulihka gaji tinggi laban sida dibayar nitihka tikas penau enggau peneleba.

“Nya deka meri penatai pemisi ngagai kita empu enggau menua laban kita di Mukah tu ila deka bulih peluang pengawa puang sereta raban pengereja pengawa besemak.

“Nya alai aku mesan ngambika Centexs terus ngaga pansik ngagai Artificial Intelligence (AI) endur meragam maya ti deka datai laban peluang menua kitai di mua manah enti chara kitai ngatur iya nengah sukut ti betul,” ku iya.

Suara Sarawak