Chara orang tengah mai Pati udah temu

SERIAN: Chara ngelakar bala orang tengah mai orang luar tama nadai pemendar (Pati) tu ditemu nengah kelai ke digaga ba batang kayu enggau daun rangkai awakka pengawa sida enda ulih ditemu raban penyaga pengelikun ti semampai gawa ba adan menua sekumbang pengerekai Covid-19 tu.

Batang kayu ti diikat segi tiga enggau daun ari pun sawit ti ditusun besilang entara kelai ti dijangka nyadi kelai jalai tauka nyadi palan nganti Pati ti deka dibai pansut di kampung sempadan Sarawak-Indonesia Kalimantan Barat.

Pegawai Medan Sektor B Ops Benteng Asisten Superintendan Megat Faizal Megat Fuad madahka modus operandi tu dipelaba siti chara baru ti dikena mai bala Pati ti udah mujur ngena jalai chit di Kampung Mongkos.

Ku iya, chara tu udah nyadi tanda dikena orang tengah mai Pati ti belalai di kampung tauka jalai chit ari genturung pendiau nya kena sidak besedia sebedau dianjung ngagai endur ti udah ditetapka.

Tandu iya, asil bejalaika pengawa mansik maya Hari Minggu ti udah, raban operasyen PGA Sarawak madahka tanda ti bisi ba tisi jalai kampung enggau ladang sawit sereta jalai chit udah ditemu sebedau tu.

“Kelai tu dipelaba nyadi palan ngambi Pati ti udah mujur ngelepaska diri ari adan nengah jalai chit.

“Udah suah operasyen mansik dipejalai sebedau tetemuka tanda tu di tisi jalai, taja pia sepengudah kami nukar chara bejaga, kelai tu udah selalu dipeda lalu pansik enggau lebih dalam deka dipejalai.

Iya bejaku munyi nya maya dirandau Suara Sarawak maya sida benung bejalaika operasyen di adan Sarawak-Indonesia Kampung Mongkos, kemari.

Suara Sarawak