Darurat ulih diketu tumu enti Covid-19 majak suman

KUCHING: Yang di-Pertuan Agong engka deka madamka Proklamasi Darurat di Sarawak tumu agi enti pengerekai pandamik Covid-19 majak suman, lalu ngujungka Pengawa Bepilih Besai Nengeri (PRN) ulih diatur.

Sekretari Besai Gempung Parti Sarawak (GPS) Datuk Seri Alexander Nanta Linggi madahka, nya deka ngujungka rayat menua ulih bejalaika hak sida milih enggau meri mandat ngagai GPS megai perintah menua tu.

“GPS andalka pemintar Agong enggau Tuai Pemegai Menua (TYT) Nengeri Sarawak dalam pekara tu,” ku iya dalam siti penerang media, kemari.

Ku Kaban Parlimen Kapit nya, Proklamasi Darurat endang patut dipejalaika laban berundingka pengelikun enggau nyawa rayat di nengeri tu ke bedau nyikap diri napi PRN ketegal pengerekai penyakit Covid-19 agi tinggi.

“GPS nerima enggau lantang ati ke perati Yang di-Pertuan Agong ngenukuka Proklamasyen Darurat di Sarawak berengkah 2 Ogos 2021 nyentuk 2 Februari 2022 dikena ngelanjarka PRN.

“Taja pia, GPS enggau seluruh rayat Sarawak ngarapka gaya menua majak manah seriris enggau pemujur Program Imiunisasyen Covid-19 Nasional (PICK).

“Dipelabaka 100 peratus penyampau tubuh orang besai tuai ba Malaysia deka nerima vaksin penuh bulan Oktober tu ila.

“Tu siti pengerembai manah laban mayuh empang deka dibuka enggau pengidup rayat ulih pulai baka selama berenggat,” ku iya.

Dulu ari nya, Yang di-Pertuan Agong, Al-Sultan Abdullah Ri’ayatuddin Al-Mustafa Billah Shah ngenukuka Proklamasyen Darurat dikena ngelanjarka PRN Sarawak ke-12 berengkah Hari Satu tu nyentuk 2 Februari 2022.

Nya nandaka nadai pengawa bepilih deka diatur dalam timpuh nya enti enda dipadamka tumu.

Dun Sarawak ke patut padam kena 7 Jun tu tadi, tang enda ulih dipejalaika laban bepanggai ngagai Ordinan Darurat (Kuasa-Kuasa Perlu) 2021.

Bekau ari nya, Dun Sarawak agi bejalai baka selama nyentukka dipadamka udah nya nitihka Pekara 18(1) Konstitusyen Perintah Nengeri Sarawak ngujungka bala Adun agi bejalaika pengawa baka selama.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak