Hak penguna enggau pedagang deka terus dijaga

KUCHING: Kaban Parlimen (MP) Kapit Datuk Seri Alexander Nanta Linggi meri terima kasih laban udah dichiri baru nyadi Menteri Dagang Dalam Menua enggau Pekara Penguna (KPDNHEP).

Sekretari Besai Gempung Parti Sarawak (GPS) nya madah, pengawa nyiri iya baru nya ngandalka iya ngesan tanggung pengawa besai nampung semua inisiatif nyaga hak penguna enggau dagang dalam menua.

“Bepelasarka peneleba megai opis menteri tu pengelama 17 bulan ke udah, aku ngaku ukai mudah megai KPDNHEP, tang semua pengawa nyadi lanchar berekat kerejasama Sapit Menteri Datuk Rosol Wahid, Tuai Sekretari KPDNHEP Datuk Seri Hasnol Zam Zam Ahmad enggau mega bala pegawai tinggi sereta semua staf KPDNHEP.

“Aku pechaya, opis menteri ulih bejalaika semua inisiatif mantu rayat enggau lanchar,”ku iya nerang, ditu kemari.

Nambahka nya ku Nanta, kebendar mayuh perambu udah dibantai dikena nyaup penguna enggau komuniti pedagang ba menua tu lebuh ninggalka Opis Menteri nya beduduk ari ex-Menteri Besai Kelapan, Tan Sri Muhyiddin Yassin ningkilka diri.

“Lebuh dichiri baru, aku naka ulih nampung semua perambu ke tejanggal nya laban fokus ngagai inisiatif perintah nyaup nyungkak ekonomi rayat sereta sektor renchit enggau dagang menua, “ku iya nerang.

Nambahka nya, Nanta mega meri besai terima kasih ngagai semua pemain industri laban udah meri jaku peransang sereta ngenang inisiatif ke udah dipejalai KPDNHEP ngambi mantu sektor renchit enggau dagang menua.

“Pemain industri mega ngarapka semua inisiatif ke udah diperambu ulih ditampung enggau dikemanah.

“Nya alai, ba timpuh tu aku deka bebendar bejalaika pangku pengawa ungkup rayat enggau menua Malaysia tu.

“Inisiatif nagang pandemik Covid-19 sereta nyungkak ekonomi menua mesti chakah dipejalai lalu begunaka kerejasama semua, “ ku Nanta.

Iya mega minta semua orang badu bepolitik lalu meri peluang ngagai Ismail Sabri megai ulu nyungkak ekonomi sereta ngemanah sistem pengerai ba menua tu.

“Tu meh maya semua kitai sama bejalaika pengawa ngagai menua dikesayau tu, “terang Nanta.

Berebak enggau nya, Nanta meri besai terima kasih ngagai Ismail Sabri laban meri pengandal sereta nyiri iya nyadi siku ari Menteri dalam rintai Kabinet.

Pia mega, iya meri besai terima kasih ngagai Kepala Menteri ke mega Chairman GPS, Datuk Patinggi Abang Johari Tun Openg laban nganjung nama iya varu nyadi chalun gawa dalam Perintah Besai di Putrajaya.

Suara Sarawak