Jayau Penyuluk Ati sebuah lagu baru berentak 60-an

SARATOK: Lagu Jayau Penyuluk Ati disadaka Frederick Bajeng siti lagu berentak 60-an ti nyeritaka cherita entara siku bujang enggau dara ti benung nanggam pengerindu.

Pengerindu seduai endang ditangam tegut sereta enda disagi layu ngapa, Jayau Penyuluk Ati mega siti lagu ti ngundan reti kaul ti chukup rapat enggau pangan diri.

 

Peranak Rumah Joan,Simpang Kabo tu sigi rinduka pengawa belagu kenyau ari mit sereta milih H&J Entertainment Studio nyadi perabung dikena ngerandang dunya pemerindang.

“Aku endang rinduka pengawa belagu kenyau ari mit tang taja pia nadai kala nganjung diri nyereta sebarang pekit.

Federick Bajeng

“Leka lagu Jayau Penyuluk Ati tu endang ditulis aku empu lalu idea deka nyadi artis rikoding tu datai tekala nya lebuh benung rindang enggau bala pangan ke bukai begagaka leka lagu dalam taun 2019.

 

“Lagu tu nadai bekaul enggau pengidup diri tauka marit sapa-sapa tang sigi semina kenang dalam lagu.

“Ngarapka mensia mayuh bela teperindang enggau keranjai jari keterubah ari aku mega ngarapka pemun tu bulih sukung enda bebagi ari mensia mayuh ti rinduka industri muzik Dayak Iban.

“Ngambi ulih angkat seriris mansang ke mua baka enggi bansa bukai,”ku iya lebuh dirandau Ruai,Suara Sarawak ditu apin lama.

Nambah nya ku iya,jam kediatu iya benung dalam perambu deka nembu lalu ngeluarka siti agi single ti disadang tembu dalam taun tu mega enti nadai penanggul datai mekul.

“Lagu kedua disadang tembu enda lama agi. Diatu, aku enggau bala bakih benung kiruh nyerenih pengawa ke patut.

“Semua leka lagu nya ila mega endang asil tengkebang ari aku empu,”ku iya seraya madahka lagu Jayau Penyuluk Ati diatu udah ulih dipeda ba Channel Youtube H&J Entertaiment Studio.

Raban bukai ti sama nyaup ngemujurka pengawa ngeluarka lagu tu iya nya Hillary (Kumang Malaysia),Jiri Jang Kidang enggau Henry Walter,”ku iya.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak