Kaban Parlimen GPS ke dipilih dalam kabinet Ismail Sabri siti kelai basa

SARATOK: Pemujur Kaban Parlimen (MP) ari Gempung Parti Sarawak (GPS) ti diberi pangku pengawa ba kabinet betuaika Menteri Besai Datuk Seri Ismail Sabri Yaakob siti kelai basa ngagai penyulut enggau peneleba sida mangku pengawa ba kabinet sebedau tu.

Adun Saribas,Mohd Razi Sitam madah, tu nandaka Menteri Besai randaka buah runding sereta penemu beguna ari raban MP GPS dikena iya mutar lalu ngatur baru ekonomi menua ngambi ulih tepulai manah baka selama.

“Bukti iya, diatu bisi empat iku MP ari GPS udah dipadu nyadi menteri penuh lalu megai portfolio ti nyadi tulang belakang ungkup ngatur pemansang menua.

“Nya alai, arapka nengah peluang tu sida (MP) ulih mai pemansang mayuh agi ungkup Sarawak laban kitai di Sarawak ditu tubah randaka pemansang.

“Kitai mega deka sama tikas enggau menua ke jauh mansang baka di Semenanjung ba sukut pemansang infrastruktur.

“Ambi chunto, baka ba sitak DUN Saribas balat bendar betapi enggau penanggul arus internet ke lubah kelimpah mayuh begunan sekula repuk ti begunaka perati jampat,”ku iya meri timbal pengaga ati ngagai pemujur MP ari GPS ke udah dipadu nyadi menteri penuh enggau sapit menteri ba kabinet baru, apin lama ke udah.

Ungkup peneku,empat iku menteri penuh ari GPS tu iya nya Tuai Whip Gempung Parti Sarawak (GPS) Menteri Kereja Raya Datuk Seri Haji Fadillah Yusof, Menteri Dagang Dalam Menua enggau Pekara Penguna (KPDNHEP), Menteri Dagang Temuai,Seni enggau Main Asal Datuk Seri Nancy Shukri enggau tMenteri ba Opis Menteri Besai (Parlimen enggau Undang-undang) Datuk Seri Wan Junaidi Tuanku Jaafar.

Udah nya, Sapit Menteri ba Opis Menteri Besai (Pekara Sabah enggau Sarawak) Datuk Hanifah Hajar Taib, Sapit Menteri Pengerai ll Datuk Aaron Ago Dagang, Sapit Menteri Perengka Pengangkut Datuk Henry Sum Agong enggau Sapit Menteri ll Menteri Pemansang Menua Pesisir Datuk Hasbi Habibollah.

Suara Sarawak