Koleksyen ba muzium mesti ditusun nitih tipan sejarah

KUCHING: Muzium Budaya Borneo disadang deka dipenyadi taun tu pengudah ke lama tejanggal.

Menteri Dagang Temuai, Seni enggau Main Asal, Datuk Abdul Karim Rahman Hamzah madah, iya lama udah nganti pengawa bejadika muzium kedua pemadu besai ba Asia Tenggara.

Ku iya, Muzium Budaya Borneo diperambu dipenyadi ujung taun 2020 tang ditangguh ketegal pandemik Covid-19.

Bekaul Muzium Sejarah Asli, ku Abdul Karim, muzium nya diatu benung dikemanah lalu engka enda ulih dipenyadi taun tu enggau ditangguh ngagai taun baru.

Ku iya, koleksyen ba Muzium Sejarah Asal tembu lama laban mesti ditusun enggau manah nitihka tipan sejarah.

“Enti nusun jemari ba rumah dipeda mudah tang enti ba muzium, genap koleksyen nya mesti ditusun nitihka tipan sejarah iya.

“Nya kebuah, lebuh temuai datai, sida deka nemu pasal koleksyen lalu ari ni koleksyen nya,” ku Abdul Karim ba aum pemberita beserimbai enggau Pengerami Makai Taun Ke-130 Muzium Sarawak.

Sama datai Menteri Muda Dagang Temuai, Seni enggau Main Asal, Datuk Sebastian Ting Chiew Yew, Sekretari Mendam Opis Menteri Dagang Temuai, Seni enggau Main Asal, Hii Chang Kee sereta Direktor Opis Muzium Sarawak, Tazudim Mohtar enggau bala temuai dipebasa bukai.

Abdul Karim madah, sekeda muzium mega deka ditumbuh baka Muzium Maritim ke dikumbai Limbungan Brooke, Muzium Pesaka di Kubu Lili, Betong, Kubu Emma, Kanowit, Kubu Brooke, Julau, Kubu Hose, Marudi enggau Taman Arkeologi Santubong.

Iya ngarapka muzium ke deka dibuka tu ulih nyendiaka palan pematak dilawa ba pengusung enggau temuai dudi hari sereta ngeranchakka agi industri dagang temuai Sarawak.

Kelimpah ari nya, Abdul Karim madah pemansang Muzium Sarawak di baruh projek Kampus Muzium Sarawak deka nyadi pemun ngagai pemansang mengeri Kuching.

Ku iya, penumbuh Muzium Guggenheim di  mengeri Bilbao, Sepanyol udah nyadi model tauka chunto ngagai menua bukai laban udah nyungkak ekonomi komuniti sereta ngagai mengeri Bilbao nya empu.

“Aku ngarap enggau andalka program dipenyadi Opis Muzium Sarawal deka ditampung nentuka Muzium Sarawak nyadi ‘Bilbao Effect of the East’ seriris enggau juluk Rajah Charles Brooke iya nya kedua pemadu besai ba Timur (second to none in the East),” terang Abdul Karim.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak