Komiti PIMM patut orang ti lurus

KUCHING: Perambu Gerempung Armada Anak Seni Sarawak (Aras) ke minta pengari ari Sarawak patut dichiri dalam komiti Serakup Industri Muzik Malaysia (PIMM) disukung Presiden Serakup Pemuzik Dayak (SPD) Aldrine Phillie tauka lebih dikelala enggau nama Depha Masterpiece.

Ku Depha, perambu nya patut diperunding sida PIMM ngambika sama adil dalam pemansang enggau pemansut jurai ti deka dikerandau dalam bidang nya.

“Ngelansa penerang dibantaika Dr Alim Empira bekaul enggau pekara tu lebih ngagai sukut insentif enggau belanja ungkup tuju pengerembai industri muzik mungkur menua kitai awakka belanja baka royalti tauka duit tulung ulih diberi terus nuju bala artis maya pengerekai pandemik Covid-19 baka diatu.

“Mayuh agi pengawa dalam muzik ulih dibantu nengah insentif tu ba menua kitai baka nulung nembiak ke udah tembu sekula dalam bidang muzik enggau nyukung sida bebelika keresa muzik dikena ngaduka sesebengkah pekara baka kelas tusyen muzik,” ku iya lebuh dirandau Suara Sarawak, apin lama ke udah.

Iya nandu, komiti ti patut dichiri mangku tanggungpengawa ba PIMM sigi endang patut pengemeran industri muzik empu ke lurus ati enggau ngembuan juluk ati tinggi dalam ngerembaika industri muzik di menua.

“Iya mega patut siku ti tebilang dalam bidang tu enggau ulih meri pangka besai ngagai pemain industri muzik ke bukai.

“Kebuah pia, laban pengawa tu ukai semina begunaka sukung ari raban artis aja, tang mungkur ngarika semua peminat muzik kitai di Sarawak kelebih agi industri muzik Dayak,” ku iya.

Depha madahka, iya endang nerima manah semua penumbuh gerempung muzik enda ngira ari sitak ni di Malaysia.

“Seagi ngembuan tuju enggau juluk ati ti manah sereta mai pemansang ngagai industri pemerindang di menua kelebih agi di Sarawak, aku sigi nerima.

“Pemansang ukai semina ba penengkebang muzik tang mega mungkur penegap ekonomi enggau pengelantang pendiau bala pemerindang.

“Pekara tu mesti adil, ngambika raban artis di menua kitai meruan bisi pengering enggau peransang nengkebang muzik,” ku iya.

Iya mega madahka, bungkur pengerembai industri muzik menua mega patut ngaul bala penanyi, pemuzik, komposer, video klip editor, injinir bunyi, pengempu studio enggau ke bukai.

Ku iya, bungkur nya besai laban semua sida nya begulai enggau ngembuan tanggungpengawa sida empu taja lebuh ngaga siti lagu ungkup bala peninga.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak