Lagu Teguh ari Jonez Mackean udah ayan di Youtube

KUCHING: Jones Mackean anak Max Kinchai, 48, udah mujur ngemansutka lagu rumpas dikumbai Teguh lalu ulih dipeda berengkah kemari ba Youtube Channel Kaban Music Production (KMP).

Peranak asal ari Bebanggai Kiba, Betong ke mega anak tuai ari empat iku diri menyadi tu mega madahka, iya kala mansutka lagu Puchau Bukit Semitau dalam album kompilasyen Sada Jauh Lemai ba taun 2020.

Jonez madahka diri nadai mayuh peneleba belagu laban suah agi ngereja pengawa ba belakang panggau baka nyaga PA System.

“Aku rindu ngambi video baka video orang melah pinang kenyau agi sekula suba sampaika ulih ngaga muzik video ungkup diri empu.

“Semua tu digaga ketegal rindu taja ngasaika diri agi mayuh pengurang,” ku iya nerang ngagai Ruai, Suara Sarawak.

Gambar Jonez begulai enggau penanyi gembar ba lagu Teguh, Alissa Easterynna.

Ngelansa pasal lagu Teguh tu, iya madahka leka enggau tiun lagu nya endang ditengkebang iya empu lalu dirikod ba Ranyai Studio sereta dikeluarka KMP.

“Lagu tu besai reti ba aku laban ditengkebang bepelasarka jalai pengidup kami sebilik ke lenyau apai, ngenang indai ke udah ditinggal siku lelaki ke pemadu disayau iya.

“Pengudah ngenang pengidup indai enggau kami sebilik ke ditinggalka niang apai ari nya datai buah penemu ngaga lagu tu. Meda mua indai nyau bemuaka penyinu ati ditinggalka apai, chukup pedis lenyau siku orang ke dikesayau ba dunya tu.

“Apai dikesayau nyau sulai, diau ba dunya baru ninggalka kami ke agi belala begulai enggau iya. Tang, indai enggau kami semenyadi mesti neruska pengidup taja ati balat berasai sinu ngenang niang apai ke udah midang,” ku Jones nusui sebana diri.

Kenu ku Jonez pengingat begulai enggau niang apai iya meruan dikeingat ari ninga lagu tu.

MUZIK VIDEO… Jonez benung ngiga ‘angle direction’ muzik video Teguh begulai enggau Selinggar Matahari, Vannessa Lee.

“Pemanah, pementas enggau penyiru niang apai meruan lekat ba ati sereta nyadika tengau enggau nyadika lalau kami napi pengidup dudi hari.

“Pengelama ngaga lagu Teguh nya enda lama, tembu selemai aja kena 10 June tu tadi. Lebuh ke ngaga leka lagu tu, chukup sinu aku betatika pengidup tudah indai ke ditinggalka apai taja mua iya nadai ngayanka diri sinu tang aku nemu, jauh ba dalam ati, iya meruan ngenang apai.

“Aku ngaga pemutus nguji nyadaka lagu digaga diri empu. Puji Tuhan, pejalai rikoding lagu tu mujur asil saup penusun muzik tebilang, Cami Tan,” ku iya madahka diri lama udah diau ba Simanggang.

DUNYA PEMERINDANG

KENANG MANIS… Gambar Jonez begulai enggau bala bakih rambau Pengawa Ngelancharka Album Kompilasyen Sada Jauh Lemai kena 5 November 2020.

Kenang manis maya merindang iya nya rambau Pengawa Ngelancharka Album Kompilasyen Sada Jauh Lemai ba sebengkah restoran di Simanggang kena November 2020 nitih SOP ke udah ditetapka perintah.

Diatu, lagu Puchau Bukit Semitau udah dipeda lebih 5,000 orang ba Youtube.

“Chukup richah pengawa kami malam nya. Nya meh kenang manis ke meruan dikeingat aku, taja bisi sinu ngenang kitai enda ulih beperindang ketegal ngerekai Covid-19,” ku Jonez seraya ngarapka lagu baru ari nya ulih diterima peminat.

Ngenang sapa ke nyadi peransang iya masuk dalam industri tu, Jonez madahka nadai orang bukai kelimpah ari sida sebilik empu ke mayuh meransang enggau nyukung iya sekalika maya tusah tauka senang.

“Jaku ajar niang apai meruan dikeingat, kekadang neritik ai mata ngenang niang apai ke jampat bendar ninggalka kami. Indai mega, meruan meri jaku peransang pasal pengidup sereta kaul dalam dunya pemerindang, seruran ngerara nangika salah singkang.

“Terima kasih mega ngagai bala bakih enggau bala menyadi laban seruran meransang,” ku iya.

BESAI JASA… Jonez begambar ungkup kenang enggau bos besai KMP, Gibson Rentap.

NELEBA DIRI IDUP CHARA BARU

Bekau ari pangka pandemik Covid-19, semua kitai nyau ngalih ngagai teknologi digital dikena nentuka pengawa kitai ulih dipejalai baka selama.

Sama mega enggau Jonez ke madahka iya naka ulih nelebaka diri enggau chara baru baka bekenaka teknologi digital ba genap pengawa nyengkaum ngena pelasar media rama.

“Pelasar media rama tu chukup besai guna ba kitai kemaya hari baka kami ke rikoding lagu. Diatu pelasar media rama baka Facebook, Instagram, Youtube enggau pelasar bukai chukup jampat dikena mantaika berita baru ungkup mensia mayuh.

“Taja nadai aktiviti merindang atas panggau tang mensia mayuh ulih meda lagu-lagu baru ba Youtube,” ku iya.

Bekaul enggau pasal timbal diberi mensia mayuh iya madah diri endang ngelalau sebarang aja pejah nyadi peransang enggau pemaik terus mansang ba industri tu.

“Arapka mensia mayuh, nyema deka meri penemu patut ngena jaku ti belebas awakka enda medis ati sapa-sapa.

“Ukai enggai nerima timbal negatif nya tang arapka jaku nya ukai jaku ti ngasuh kitai labuh tauka ngemaruhka orang.

“Kitai sama nemu, semua mensia bela bisi pengurang enggau enda ulih dikelari ari ngereja pengilap,” ku Jonez ke ulih dititihka peminat ari Facebook, Instagram enggau Youtube ngena nama Jonez Mackean sereta Tik Tok : jonezmack.

Suara Sarawak