Lupung digaga Penan alus, manah sereta nyelai

KUCHING: Seni kraf jari bansa Penan iya nya nganyam lupung tauka belanyat (jaku Penan) udah muka peluang dagang ngagai Sabrina Nayah Joshua, 30.

Indu Iban asal Sri Aman tu madahka, lupung siti ari kereban ke suah digaga Penan ngena asil ke diambi ari babas iya nya rutan.

“Kelia lupung dikena orang mai bekal, butul ai, buah enggau keresa bumai tauka bekebun.

“Diatu, laban dunya udah moden lupung digaga nyadi keresa moden enggau kotemporari nyadi beg disandik maya pengeramo makai lemai, barang pengias rumah, tepa enggau ke bukai,” ku iya lebuh dirandau Suara Sarawak, kemari.

Ku Sabrina, kelimpah nambahka penatai pemisi iya empu, dagang lupung tu mega meri penatai pemisi bansa Penan ti ngayam lupung nya ke iya.

Sabrina Nayah Joshua.

“Kenyau taun 2015 suba, aku kala begulai enggau bansa Penan di menua ulu laban gawa din.

“Ari nya aku meda produk kraf jari sida (Penan) alus, manah sereta nyelai.

“Dia aku bulih runding deka mantu sida nyual lupung laban lebuh aku ngayanka lupung tu ba media rama, timbal ari orang ti deka meli majak nambah,” ku iya.

Ngaku media rama nyadi pelasar iya bedagang, Sabrina madahka pemeli suah datai ke rumah iya ngiga sereta meda lupong ti dikerindu sida.

“Raban orang indu chukup rindu ngena lupung laban ulih dikena nyadi keresa fasyen enggau ngias rumah.

“Ninting bulan, enda kurang ari lima igi lupung ulih dijual aku, lalu rega lupong tu dijual aku nitihka pemesai,” ku iya.

Sabrina madahka diatu, lupong ke dijual iya bisi diubah nyadi moden tauka dianyam nyadi beg rutan.

“Suba aku meli semina ungkup aku empu aja, enda nyangka peminta orang ti meda manah ngujungka aku ulih muka dagang sekali.

“Diatu aku ngena page facebook SNJ Collection’s @ Algasana Boutique ngelakuka lupung.

“Udah tama dalam dunya dagang, aku ngasaika diri ulih ngelempungka tating belanja kami sebilik laban sigi bisi minat bedagang.

Sabrina chakah bejual produk kraft jari bansa Penan ari rutan.

“Chura lupung ti dianyam bansa Penan mega ngasuh aku ransing bejual laban lupung tu enda muntang digaga, tang lebuh udah tembu produk tu chukup nyelai,” ku iya.

Tandu Sabrina, iya begunaka pukul urung RM2,000 sebulan dikena meli lupung ari bansa Penan.

“Lupung ti dijual aku kala dibeli pemeli ari Kuwait, Singapore, Brunei enggau Australia.

“Tang pemeli lupung ninting bulan sigi kitai di serata Sarawak empu kelimpah kaban di Selangor, Johor, Pulau Pinang, Kuala Lumpur enggau Sabah.

Sabrina madahka pemar sigi enda kala putus nuntung iya tang pengeransing ati deka bedagang tetap teguh dipegai iya belama.

Ngaga sigi lupung ukai pekara ti muntang, tang begunaka awak ti lama.

“Nyual produk kraf jari bansa bukai ukai pekara ti muntang laban aku bansa Iban.

“Lebuh orang betanya aku mesti pandai sereta jampat nyaut.

“Nya alai, aku belajar proses, ngiri penemu enggau ngelala sekeda keresa dikena sida ngaga kraft jari nya,”ku iya.
Taja agi biak sereta agi mimit penemu dalam dunya dagang, Sabrina madahka iya andalka diri ulih nyadi pemekal produk kraft jari rutan ngagai luar Sarawak.

“Ngarapka dagang mit aku tu dikelala mensia mayuh taja pan aku agi baru ngaul diri dalam dunya tu,” ku iya.
Ngelansa proses ngaga lupong, Sabrina madahka lupong digaga ari rutan ke diambi ba kampung.

“Rutan ti diambi ari kampung alu diraut mit tauka alus sereta dibagi ngagai dua chura iya nya chura chelum enggau chura tulin.

“Chura tulin rutan nya endang datai ari puak rutan, lalu chura chelum digaga sida nengah chara ngerendam enggau ngerebus rutan.

“Rutan ti udah diraut deka direndam enggau sebansa daun tumbuh,” ku iya.

Enda naka nya aja, Sabrina madahka rutan ke direndam nya deka direbus lalu diperap enggau tanah awakka ulih mali ngagai chura chelum.

“Udah chukup perap baru sida nyembi rutan nyentukka rangkai.

“Ngaga sigi lupung begunaka awak ti lama laban nganti chura chelum rutan nya lekat.

“Udah rangkai baru sida nganyam lupong, makan chura tulin enggau chura chelum baka ti dipeda kitai ngelama tu,” ku iya.

Ku iya, bansa Penan nusi lupong ti dianyam sida endang ngena chura bungai Borneo.

“Sida nisi ngagai aku nadai belajar chura ari orang, nama chura ti mansa runding, chura nya meh dianyam sida iya.

“Aku empu tekadang alit ati enggau chara sida laban chukup pandai sereta landik nganyam,” ku iya.

Suara Sarawak