Palan Makit Sungai Antu di Sibu likun

SIBU: Palan Makit Sungai Antu nyadi palan kedai makai keterubah ba baruh pegai Kaunsil Mengeri Sibu (MPS) ti udah ditentuka likun ari kena rampit pandemik COVID-19.

Kebuah munyi nya, semua pendaja nyengkaum pedaja ba palan nya udah genap nerima tuchuk vaksin.

Nitihka penerang ari Komiti Tetap Pedaja enggau Pedagang Mit MPS Kaunselor Albert Tiang Ming Hii lebuh dirandau ensanus, kedai makai nya bisi 15 buah luntang kedai enggau semua pendaja nyengkaum staf sida bela udah genap nerima vaksin.

“Pedaja nyengkaum staf sida ba tujuh agi palan kedai makai ba baruh MPS iya nya Pasar Sentral Sibu, Taman Selera Harmoni, Taman Selera Muhibbah, Palan Pedaja Khoo Peng Loong, Pasar Pedaja Taman Rejang, Pasar Sungai Merah enggau Pasar Jalai Tiong Hua apin genap nerima tuchuk vaksin tang sekeda ari sida udah nerima tuchuk dos keterubah.

“Semua sida tu ditaga nerima tuchuk dos kedua vaksin berengkah minggu kedua bulan tu,”ku iya.

ALBERT TIANG

Tiang mega madahka, semua penaja ba Palan makit Sungai Antu nyau udah nerima setipikit vaksinasyen ngambika sida iya ulih nunjukka diri udah genap betuchuk vaksin.

Ku iya nambah baru, MPS ngena inisiatif tu (mesti mandangka setipikit vaksinasyen) nyadi siti ari Atur Pengawa Standard (SOP) ungkup semua komuniti dagang ba Sibu.

“Sebedau tu, semua komuniti dagang dipinta lengkas nerima tuchuk vaksin sebedau muka kedai.

“Enti udah betuchuk vaksin, baru sida iya tau muka premis, MPS sigi bisi hak nagang sida neruska aktiviti dagang nyema apin divaksin.

“Setipikit vaksinasyen MPS tu semina diberi ngagai orang ke udah genap dua dos vaksin” ku Tiang.

Iya mega nerangka tu entara inisiatif MPS dikena nentuka palan nya nyengala likun ngagai mensia mayuh sereta enda nangi datai ke premis nya.

Kelimpah ari nya, iya madahka SOP tu mega manah ngambika penguna berasai likun enggau enda nangi datai milih pemakai.

“Setipikit vaksinasyen MPS tu nyadi pelasar tauka kelai dikena ngemujurka aktiviti ekonomi ba Sibu. Tu mega dikena ngidupka pun penatai pemisi raban pedaja ke udah lama tepagang ketegal pandemik tu.

“Enti bisi setipikat tu, mensia mayuh andal ati enggau enda takut milih pemakai tauka datai bebelika barang,” ku terang Tiang.

Suara Sarawak