Pemujur Bonnie deka diberi basa

MUKAH: Perintah Sarawak deka meri insentif ngagai pemenang midul emas Paralimpik Tokyo 2020, Bonnie Bunyau Gustin.

Kepala Menteri Datuk Patinggi Abang Johari Tun Abang Openg madah, insentif nya kelai basa ngagai pemujur atlit nya ke mega anak Sarawak.

“Meri pengaga ati ngagai iya (Bonnie Bunyau) laban udah mujur bulih midul emas ba Lumba Paralimpik Tokyo 2020 serak tu.

“Kitai (Perintah Sarawak) deka meri insentif ngagai Bonnie tang nama bagi insentif nya bedau temu agi,” ku iya nengah sebengkah aum pemberita pengudah bejadika Centexs Mukah ditu kemari.

Abang Johari mega madah Bonnie deka nerima insentif ari perintah Malaysia.

“Nya alai, kitai ngarapka mayuh agi pemujur bukai deka dijapai ba lumba ke sama ungkup bala atlit Paralimpik menua,” ku iya.

Bonnie Bunyau Gustin mujur bulih midul emas keterubah menua nengah main powerlifting kategori 72 kg ba Lumpa Paralimpik Tokyo kemari.

Bonnie mega mujur mechahka rikod dunya nengah pemujur ngangkatka pemerat 228 kg ke sebedau tu dipegai atlit ari Iraq, Rasol Mohsin enggau rikod 227 kg ba pekit Paralimpik di Brazil.

Suara Sarawak