Pemutus Agong seriris enggau juluk perintah Sarawak

KUCHING: Sarawak andal pemutus ke digaga Yang di-Pertuan Agong endang seriris enggau juluk perintah nengeri ti ngemeratka pengelikun enggau pengelantang rayat sereta negika atur demokrasi beparlimen.

Opis Kepala Menteri (CMO) madah, nengah atur Proklamasi Darurat di Sarawak, nyadi Pengawa Bepilih Besai Nengeri (PRN) ke patut diatur ulih ditangguh ngagai siti haribulan baru.

“Kami meri besai basa enggau terima kasih ngagai Yang di-Pertuan Agong beduduk ari pemintar iya dikena nentuka PRN semina ulih diatur enti pandemik di nengeri tu ulih jaga enggau nadai ngeruga pengelikun rayat.

“Enti penyadi pengerekai Covid-19 di nengeri tu udah datai ba tikas manah baka ke udah dilalau opis pengerai enggau ejensi bekaul sereta bepelasarka data saintifik iya nya PRN likun diatur kelimpah enda mai penusah ngagai rayat,” ku CMO nengah sebengkah penerang, kemari.

Taja pia, CMO madah, dikena nentuka atur demokrasi beparlimen dijaga, mandat ari rayat Sarawak patut digiga baru pengudah pandemik pulai manah.

“Nya alai, Ordinan Darurat tu deka abis kena 2 Februari 2022 tauka tumu agi ari nya nitihka gerah Yang di-Pertuan Agong pengudah berundingka penemu ari Perintah Sarawak.

“Nengah atur nya, nyadi dijamin mandat ari rayat deka diulih enggau lengkas enti pandemik udah pulai manah baka selama.

“Iya ke beguna PRN semina deka digaga bepelasarka data saintifik enggau sanding penemu ari raban profesional laban pengelikun enggau pengerai rayat enda ulih dimain,” ku tandu penerang nya.

Perintah nengeri berebak enggau nya bebasaka pemutus Yang di-Pertuan Agong Al-Sultan Abdullah Ri’ayatuddin Al-Mustafa Billah Shah enggau meri sukung penemu ngagai Proklamasi Darurat sereta mega Ordinan Darurat di Sarawak ke berengkah 2 Ogos 2021 nyentuk 2 Februari 2022.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak