Penatai pemisi Sarawak deka terus betambah

KOTA SAMARAHAN: Perintah Sarawak dipelaba deka nyendiaka belanja urung RM63 billion manggai taun 2025 ungkup pemansang ekonomi menua.

Kepala Menteri Datuk Patinggi Abang Johari Tun Openg madahka, RM30 billion deka nyadi belanja sektor mensia mayuh ke alai RM33 billion deka nyadi belanja ungkup sektor peribit enggau belanja alternatif.

“Nyema pejalai perengkaguna baka infrastruktur jalai alun enggau perengkaguna digital bepelasarkan 5G udah tembu, kitai deka ulih narit pemeranak puku.

“Kelimpah ari nya, pemeranak puku deka datai ke Sarawak ngujungka kuasa meli sida nyadi besai,” ku iya.

Abang Johari bejaku munyi nya rambau nyuaka Perais Pekit Seni Langkar Langit ti diatur Hock Seng Lee (HSL) ditu kemari.

Ku iya, pekara nya deka nyadi peluang serikat besai ngaga rumah nitihka peminta pemeranak puku ari luar.

“Nya alai, ari diatu nyentukka taun 2030 tikas penatai pemisi kitai mega nambah.

“Asil Penatai Pemisi Dalam Menua (KDNK) bagi Sarawak mega dipelabaka belipat ari RM130 billion nambah ngagai RM200 billion lebih dalam timpuh 10 taun.

“Sekeda orang ngumbai juluk ati aku kelalu tinggi, tang tu meh chara kitai netapka tagit,” ku iya.

Nya alai, ku iya, sida seruran deka meri fokus ngagai pengetan rampa menua ti nyadi sebagi ari pekara pemun dalam Strategi Pemansang Lepas Covid-19 (PCDS) 2021.

Sama bisi datai Menteri Kandang Menua enggau Pengawa Berumah Datuk Seri Prof Sim Kui Hian enggau Direktor Besai HSL Datuk Paul Yu Chee Hoe.

Suara Sarawak