Pengelantang kaban PVTKR dikuarantin ba Taman Samarindah dikenati

KOTA SAMARAHAN: Sepenyampau 40 iku raban Serakup Veteran Soldadu Kor Renjer (PVTKR) di Taman Samarindah udah nerima bantu pemakai PVTKR, ditu tadi.

Presiden PVTKR Lt Kol (B) Mohd Melintang Abdullah madah, raban exco PVTKR udah ngemendarka agih belanja meri bantu pemakai ngagai kaban sida ke diterit Atur Mindah Betagang Dipekul (PKPD).

“PVTKR naka ulih minta bantu pemakai ari pengari rayat, Opis Pengintu Pengelantang Mensia Mayuh 9JKM) enggau Opis Pekara Veteran (JHEV) Sarawak,” terang iya.

Iya madah, PVTKR datai nganjung bantu ngagai raban soldadu ke diau ba Taman Samarindah beduduk ari perintah neritka PKPD ba genturung pendiau nya.

Bantu pemakai nya udah disua Exco Ngintu Pengelantang PVTKR Aklimen Nyapong ngarika Melintang.

Taman Samarindah nya entara genturung pendiau pemadu besai di Kota Samarahan.

Kelimpah ari nya, Taman Samarindah diterit PKPD berengkah ari 17 ngagai 30 Ogos tu beduduk ari kes positif Covid-19 ke majak nambah enggau penyadi Kluster Bandar Riyal berapa minggu ke udah.

Suara Sarawak