Pengerugi ditapi pekebun teputar

SARIKEI: Perintah deka terus mantu mutarka pemayuh asil kebun ti enda abis dijual dikena ngurangka pengerugi ditapi pekebun di menua tu.

Menteri Muda Pemansang Mengeri enggau Pengereja Asal, Datuk Len Talif madahka, inisiatif tu udah dipejalaika ari kenyau beberapa taun ke udah.

Taja pia, iya madahka pengawa tu terus dipejalaika berengkah taun 2020 ketegal mayuh pekebun napi penusah nyual asil utai tanam sida laban pengerekai pandemik Covid-19.

“Program tu dipejalaika ba selampur menua Sarawak nengah Opis Betanam Betupi enggau Gerempung Orang Bumai Sitak. Kami meri bantu tu nengah chara meli asil kebun lalu diagihka baru.

“Tu siti ari komitmen perintah dikena mantu raban pekebun ari nanggung pengerugi ketegal asil dagang ti enda ambis dijual,” ku iya madah ngagai raban media sepengudah meri nyuaka kambut asil kebun ngagai raban terabai komitj di Dewan Suarah ditu, ensana

Nya alai, iya meransang raban pekeun ngena peluang tu enggau manah kena mutarka penanggul ngagai ejensi bukai ke sama bisi meri bantu.

Berebak enggau nya, perintah semampai ngadu mayuh macham pengawa dikena mantu ngurangka penusah sida ti kena empas pandemik tu.

Kenu ku Adun Kuala Rajang nya, pengawameli asil kebun nengah chara nangkat terus ukai semina dipejalaika di Zon Sarikei tang mega di Tanjung Manis dikena mantu pekebun ba sitak nya.

“Pengawa tu udah lama diatur tang semina taun siti nyin suba utai tu ransing dipejalaika ngagai orang ke betanam laban deka sama enggau sida ngelaku ka asil dagang sida sepengudah Atur Mindah Betagang (PKP).

“Orang betanam ke dituntung penusah baka tu tau betelefon nuju Opis Betanam Betupi tauka Gerempung Orang Bumai ba sitak diri empu,” ku iya.

Program meri asil kebun tu siti ari chara mandangka pengaga ati ngagai raban terabai komuniti di Sarikei.

Sama bisi datai pengari Pegawai Pelilih Sarikei Ainur Yazmin Zaini, Pegawai Betanam Sarikei Rainy Yaman, Chairman Serakup Orang Betupi sitak Sarikei Pemancha Ladin Sebang, Menijar Besai Serakup Opis Betupi sitak Sarikei Yunus Akup enggau Mandal Pegawai Opis Betanam Betupi Sarikei Muhammad Ridzuan Paul Thomas Abdullah.

Suara Sarawak