Penusah ditapi serikat IKS nerima perati Perintah Sarawak

KUCHING: Urung 40,000 serikat industri mit enggau jelan pemesai (IKS) deka nerima RM10,000 nengah Bantu Khas Sarawakku Sayang (BKSS) 7.0.

Kepala Menteri Datuk Patinggi Abang Johari Tun Openg madah, bantu nya diberi Perintah Sarawak ngagai PKS laban dagang enggau untung sida balat kusut ketegal pandemik Covid-19 tu.

“Perintah Sarawak bejalaika inisiatif tu ngena belanja RM400 juta lalu bayar lansam deka diberi ngagai genap IKS.

“Ngarapka bantu belanja tu ulih nyaup sida meruan bedagang kelebih agi dikena mayar gaji staf sida,” ku iya.

Abang Johari mansutka jaku nya pengudah Pengawa Nyuaka BKSS 6.0 enggau mantaika BKSS 7.0, ditu ensanus.

Ku iya, bantu RM10,000 nya dikena nambah bantu diberi Perintah Besai ngagai IKS ba selampur menua.

“Pia mega, mayuh sida nyuwa endur bedagang lalu bantu nya dikena nyaup ngelempung tating belanja sida.

“Pia mega, berapa bulan agi aku deka ngemendarka ekonomi kitai dibuka enggau ulih nyaup sida ngepunka baru dagang enti sema kitai nyapai 80 peratus imuniti beraban,” terang iya.

Nambahka nya, Abang Johari madah, BKSS 7.0 deka mantu sida dalam sektor berumah kelebih agi bejalaika projek Perintah Sarawak.

“Ketegal Atur Mindah Betagang (PKP), Mayuh projek kitai tejanggal lalu kami ngelanjarka timpuh (EOT) ngagai sida sereta enda ibuh mayar penalti ketegal projek laun tembu.

“Tu nentuka kunteriktor nampung projek ke dipejalaika sida di Sarawak baka Projek Rayat, Program Transfomasyen Menua Pesisir (RTP) enggau semua projek ke tejanggal nya,” ku iya.

Ku Abang Johari, pekara nya beungkus RM400 juta laban Perintah Sarawak mesti mayar projek ke ditangguh nya.
Nya alai ku iya, Perintah Sarawak nanggung RM800 juta ungkup BKSS 7.0.

Suara Sarawak