Penyakal sedia meri penemu bekaul enggau bajet nengeri

KUCHING: Bajet Nengeri mesti berundingka pengawa nyaga penatai pemisi rayat kelebih agi lebuh perintah diatu ngemeratka pengawa nagang pengerekai pandemik Covid-19.

Adun Ba’kelalan, Baru Bian madah nya kebuah Kepala Menteri Datuk Patinggi Abang Johari Tun Openg diatu mesti bejimat lebuh ngaga pemutus ngagihka belanja seriris enggau polisi nyungkak baru ekonomi menua pengudah igi penyakit tu pukas ila.

“Berebak enggau nya, iya mesti lurus ati lebuh ngagihka belanja kelebih agi diatu kitai nyau semak deka bepilih.

“Maya penusah baka tu, Kepala Menteri ulih ngangauka pengari penyakal meri sanding penemu pasal pekara ke mesti diperunding dipasuk dalam bajet nengeri.

“Nadai pengerugi iya mendingka penemu ari semua orang,” ku iya ke mega Kaban Supreme Kaunsil Presiden Parti Sarawak Bersatu (PSB).

Iya ngelansa pasal penerang dibantaika Speaker Dun Datuk Amar Mohd Asfia Awang Nassar kena Hari Tiga tu tadi pasal Bajet 2022 enda ibuh dibantai enggau dikemendar dalam Dun seriris enggau Ordinan Darurat (Kuasa-Kuasa Perlu) Sarawak 2021.

Ku Baru, kuasa diberi ngagai Kepala Menteri enggau Kaunsil Pekara Belanja Nengeri ngambi ngemendarka Bajet 2022.

“Kepala Menteri mesti lurus ati lalu bejalaika tanggung pengawa enggau manah ngagihka Bajet Nengeri maya darurat mandangka nadai chara raban Dun ngambi beratika bajet nya.

“Aku andalka iya deka beratika tu chara positif ari semua rayat Sarawak enti sema iya ngaga pemutus ngemendarka pengari bala penyakal mantaika penemu.

“Nya alai, Kepala Menteri enggau Raban Bekuasa Pekara Wang Sarawak mesti ngena kuasa diberi Yang di-Pertuan Agong Al-Sultan Abdullah Ri’ayatuddin Al-Mustafa Billah Shah enggau manah,” terang iya.

Suara Sarawak