Perintah deka ngemansang kandang rumah ti lebih menyana ungkup rayat

KUCHING: Perintah Sarawak merambu pemansang pengawa berumah ti lebih menyana enggau manah ba mengeri Kuching awakka ulih meri palan pengentap pendiau ti meruan sereta lebih kondusif ngagai rayat.

Kepala Menteri Datuk Patinggi Abang Johari Tun Openg madahka, ungkup tuju nya, Opis Menteri Pemansang Mengeri enggau Pengeraja Asal mesti bekerejasama enggau Opis Kandang Menua (PBT) dikena ngelala palan ke patut dikemansangka.

“Kitai mesti merambu pengawa berumah enggau manah awakka nadai palan ti enda ngembuan perambu ti nadai berurun baka penanggul palan setinggan ba mengeri.

“Nya alai, dua entiti nya mesti bekerejasama ngelala palan ti deka dikemansang nyadi palan berumah ti strategik enggau manah ngujungka meri pengelantang ngagai orang ti nguan rumah nya ila,” ku iya.

Abang Johari bejaku munyi nya, rambau bejadika Hari Bandaraya Kuching ti ke-33 ditu, kemari.

Tandu Abang Johari, nyendiaka palan diau ti manah enggau beresi amat beguna ngagai orang ke diau di mengeri.

Iya madahka, nya seriris enggau juluk ati Kuching deka nyadi mengeri maju enggau mengeri pintar di Malaysia manggai taun 2030.

Program ti ngena rambai jaku transformasyen digital ngelangkar Kuching nyadi mengeri pintar nya engkeman ngagai siti fokus besai perintah nengeri iya nya ekonomi digital.

Ungkup rikod, kena 1 Ogos 1988 Kuching bebali ngagai status mengeri ke alai palan tu nyadi mengeri ti ke-3 ba Malaysia maya nya nangkan Kuala Lumpur enggau Ipoh.

Seriris enggau nya, dua ejensi kandang menua digaga iya nya Dewan Bandaraya Kuching Utara (DBKU) enggau Majlis Bandaraya Kuching Selatan (MBKS) diuluka dua iku Datuk Bandar.

Tu meh penyelai Kuching, runding ngaga dua bengkah ejensi tu dipansutka Tuai Pemegai Menua Tun Pehin Sri Haji Abdul Taib Mahmud lebuh iya nyadi Kepala Menteri awakka mengeri tu mansang enggau lebih efisyen sereta sistematik.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak