Perundingka Geran Dagang Khas ungkup OKU

KUCHING: Gerempung Anak Asi Sarawak (Perais) minta Perintah Sarawak ulih berundingka bantu ngagai raban Orang Nyelai Pendiau (OKU) ti nerima Geran Khas Prihatin (GKP).

Presiden Perais Rapelson Richard Hamit madahka, sida nerima sebana ti madahka OKU buta ti kala nerima bantu ninting bulan Bantu Khas Sarawakku Sayang (BKSS) taun nyin kemari enda bulih bantu ke sebaka ba taun tu.

“Pekara tu engka laban sida tu mega penerima GKP ngujungka sida enda ulih nerima BKSS enggau Bantu Prihatin Rakyat (BPR).

“Nya alai, aku minta Perintah Sarawak enggau Perintah Besai perundingka mih bantu tu ungkup raban nya,” ku iya dalam siti penerang media, kemari.

Berebak enggau nya, iya mega minta Perintah Sarawak nyendiaka Geran Dagang Khas ungkup raban OKU dalam mantu raban tu bedagang.

“Kebuah pia, laban geran khas dagang RM10,000 ti dipadahka Kepala Menteri dalam BKSS 7.0 enda mungkur raban OKU ti bedagang laban nadai direjister ba baruh Gerempung Pengelikun Rama (Perkeso),” ku iya.

Nangkan nya, Kaunsil Anak Asi Sarawak (Manis) mega minta Perintah Sarawak patut berundingka operasyen Palan Rumah Urut Tradisional dibuka nitihka Atur Pengawa Standard (SOP) ti terit sebaka enggau operasyen salon enggau kedai guntin ke udah dibuka ungkup Pelin Ngemanah Ekonomi Menua Renggat Ketiga.

Suara Sarawak