Pesaka menua mesti dijaga badas

KUCHING: Komuniti menua patut dilalau ngambika besaup ngetanka pesaka menua ti ulih dipeda enggau pesaka ke enda dipeda ba menua tu.

Pengelicha Kanan Antropologi enggau Sosiologi Universiti Malaysia Sarawak (Unimas) Dr. Elena Gregoria Chai madahka, pesaka ti nyata baka kubu dampih ngagai peranak menua ti diau ba palan adat asal nya.

“Siti pansik ti dipejalaika kami iya nya bekaul enggau kubu ke alai kami nemu bisi 23 kubu di serata Sarawak, 14 buah ari kubu nya agi mengkang nyentuk diatu tang semilan ke bukai udah lenyau ketegal pemansang.

“Kubu siti ari pesaka ti nyata lalu kami nguji deka ngeletakka elemen enda nyata ba pesaka tu baka penerang kemaya kubu nya digaga, sapa ti mantu atur kolonial British, keresa berumah enggau ke bukai,” ku iya lebuh bejaku ba webinar Program The Sarawak Initiatives (TSI) bekaul Kelai Sarawak ari Adat Asal nengah aplikasyen zoom, kemari.

Ku iya, komuniti menua ulih ditegapka sereta ulih mantu Opis Muzium Sarawak nyaga pesaka ti nyata enggau enda nyata tu.

“Opis Muzium Sarawak bejalaika tanggungpengawa ti besai dalam nyaga pesaka menua, tang sida mega ngembuan tanggungpengawa ti bukai.

“Aku pechaya, kitai ulih negapka komuniti menua nengah opis pelilih menua, Komiti Pemansang enggau Pengelikun Genturung Pendiau (JKKK) tauka gerempung ukai dikuasa perintah (NGO) nyaga pesaka ti nyata enggau pesaka ke enda dipeda nya,” ku iya.

Ba pekara bukai, Dr. Elena madakla kerejasama komuniti menua mega beguna dalam nentuka pesaka di Sarawak terus dijaga sereta diintu.

“Kitai mesti nyedarka sereta deka nyaga pesaka tu laban enti udah lenyau ila kitai deka ngasai pengelenyau ti besai ngagai komuniti diri empu kelebih agi Sarawak.

“Kitai mega mesti patut deka nyaga pesaka nya laban diatu keresa lama tu chukup berega enggau patut diayanka nyengkaum dijaga selamat,” ku iya.

Ku Dr. Elena agi, genap pesaka ti patut dipansik deka disimpan ngambika pesaka nya ulih diaku genap komuniti etnik ke ngempu.

“Nya alai, semua dokumen bekaul pesaka nya ulih ditemu mensia mayuh awakka komuniti ti ngempu pesaka nya ulih ngelakuka adat asal sida enggau ngetanka adat asal sida,” ku iya.

Suara Sarawak