PRN12: Chalun baru mesti dikelala rayat

PAKAN: “Kami sigi nyukung sebarang langgur pengawa ti dekaka sitak Pakan diarika chalun baru ba pengawa bepilih nengeri (PRN) deka datai,” ku ex-kaunselor Madeline Ugap.

Ku iya, taja pia chalun ke dipilih nya mesti orang dikelala, mudah dilawa rayat kelimpah seruran ‘ayan mua’ maya rayat dituntung penusah.

Peranak Rumah Phillip di Semukau nya mansutka pekara nya nimbal penemu dipansutka Tuai Pating Parti Pesaka Bumiputera Bersatu (PBB Pakan ti minta chalun baru dipilih ngarika Gempung Parti Sarawak (GPS) ba PRN ke-12 ti bisi ayan ba surat kabar apin lama ke udah.

“Sitak Dun Pakan endang patut diarika chalun baru, ukai ngumbai penyandang diatu enda manah tang asai ba aku udah datai maya ditukar.

“Kebuah pia, laban rayat ditu tubah begunaka penemu enggau buah runding baru ari orang baru dikena nambahka pemansang di Pakan.

“Enda ibuh aku nyebut sapa nama chalun tu, tang tebal agi peranak ditu nyangka bisi udah ngelala bagi chalun ti patut dipilih.

“Pia mega, chalun baru tu ila mesti regas ngesah rayat. Ukai semina regas ngayanka mua diri lebuh semak pengawa bepilih aja,”ku iya.

Nangkan ke nya, Madeline ngarapka peranak Pakan pintar chalun ke betul maya PRN ti deka datai ke pemaik anak uchu dudi hari.

Suara Sarawak