Projek Jalai Suri-Tuie dikearap jampat tembu

SPAOH: Perambu numbuhka Taman Betanam Betupi Saribas di Lubok Tamang ulih dirumban enti Jalai Suri-Tuie renggat keterubah ulih ditembu pengudah ke lama tejanggal ketegal Atur Mindah Betagang (PKP).

Adun Saribas, Mohammad Razi Sitam madah, Renggat Keterubah Jalai Suri-Tuie diatu udah tembu 52 peratus.

“Projek tu tejanggal ketegal PKP enggau kebuah bukai. Taja pia, timpuh baru projek tu tembu udah diperati baru.

“Nya kebuah, aku andalka perintah muntang agi ngerumban projek Taman Betanam Betupi Saribas ti udah dikemendar ba tanah pemesai lebih 1,400 hektar enti jalai nya ulih ditembu,” terang iya.

Razi mansutka jaku nya ngagai Suara Sarawak pengudah Pengawa Nyuaka Bantu Kereban Berikan (BIPPN) ba Stesyen Betanam Betupi Spaoh, ditu ensanus.

Terang iya, Taman Betanam Betupi Saribas nya projek besai ngna konsep agro dagang temuai ungkup rayat.

“Tu sebengkah projek dikemansang ngambi nyukung Bagi Menua Betong nyadi palan tibang pemakai di Sarawak.

“Ke bukai nya meri penguntung ngagai peranak ditu lalu aku andalka taman nya deka nyungkak ekonomi peranak kelebih agi di Saribas,” ku iya nerang baru.

Nambahka nya ku Razi, raban ari Kaunsil Pemansang enggau Pengintu Tanah (Pelita) sereta Kaunsil Pengeraja Asal enggau Rampa Menua (NREB) mega udah datai ngabas palan nya.

Kelimpah ari nya, iya ngarapka semua pengawa ke tejanggal ulih dirumban nentuka Taman Betanam Betupi Saribas ulih dikemujur.

Suara Sarawak