Projek Waterfront Sri Aman tembu 85 peratus

SRI AMAN: Projek Waterfront Sri Aman ti dikearap nyadi palan penyungkak ekonomi peranak ba Sri Aman deka tembu enda lama agi.

Menteri Muda Pengintu Pendiau Raban Bansa Datuk Francis Harden Hollis madahka projek nya diatu agi ba tikas 85 peratus deka tembu.

“Projek waterfront dibagi ngagai tiga bagi iya nya jelatong, palan bejalai sereta palan seni enggau main asal.

“Mensia mayuh udah ulih meda langkar jelatong sereta bejalai di palan tu tang palan tu bedau tembu penuh, laban palan tu deka dipasangka replika Bujang Senang enggau tulis ‘AkuSayauKA Simanggang’,” ku iya.

Adun Simanggang nya mansutka pekara nya pengudah ngabas Projek Waterfront Sri Aman ditu, kilah ensana.

Nangkan nya, Harden madah pengawa di projek palan bejalai dampih jelatong mega benung digaga iya nya kereja nyemin jalai entara Topikong Ciyun.

“Baka nya mega, ba palan seni enggau main asal pengawa bukai agi benung chakah dipejalaika sida kunteriktor.

“Lebuh tembu ila, peranak Sri Aman ulih temegah laban projek tu ulih nambahka pengerembai ekonomi sereta ngelakuka produk dagang enggau produk dagang temuai sida,” ku iya.

Berebak enggau nya iya meri terima kasih ngagai Perintah Sarawak laban seruran berundingka aspirasyen rayat.

“Ubah landskap pemansang tu ila ulih digaga nyadi pelasar dikena nambahka penatai pemisi paranak ti diau ditu.

“Aku ngarapka rayat Sri Aman terus nyaga tebing Sungai Batang Lupar sereta nyaga pemeresi sungai kitai.

“Aku mega ngarapka bisi jaga nyaga palan tu ila dikena nyeliahka orang ngenyaika perengkaguna ti disediaka ditu,” ku iya.

Sama bisi datai Tuai Opis Kaunsil Kandang Menua Sri Aman (MDSA) Anthony Abell Chendan, pengari Konsortium Bumi Consultant and Service Sdn Bhd David Keen Hollis enggau pengari Mexajati Sdn Bhd Wong Chung Ming.

Suara Sarawak