Putar lengkas isu servis ATM di Engkilili

ENGKILILI: “Di menua Engkilili ukai rayat ti sebana nadai duit tang penanggul bank ke suah abis duit,” pia ku sebana siku peranak asal menua ditu ti enggai disebut nama madah ngagai Suara Sarawak.

Kenu ku Kaban Kunsil Nengeri (Adun) Engkilili Dr Johnical Rayong Ngipa, penanggul servis ATM ke jampat abis duit ba Engkilili suah dibantaika iya maya baum ba Dun enggau ayan ba surat kabar.

“Taja pia, nyentuk sehari tu lalu nadai timbal ari raban bekaul. Nya alai, aku sekali agi minta sebana rayat bekaul enggau servis ATM tu mesti diputar lengkas ungkup pengelantang rayat sitak Engkillili.

Dr Johnical Rayong Ngipa

“Tambah mega, diatu kitai benung betapi enggau munsuh enda dipeda iya nya Covid-19 nyadi sinu ngenang penusah rayat ti enda ulih mindah jauh lalu begunaka permit ari polis enti deka ngilah pelilih menua bukai”ku iya maya dirandau pemberita Ruai, Kemari.

Berebak enggau nya, Menijar Bank Betanam Betupi (Agrobank) Pampang Sri Aman,Wan Hamzah Wan Masra madah pekara nya deka diperatika sida enggau silik.

“Kenyau pelilih ditu udah disediaka servis Mesin Wang Automatik (ATM) ari Agrobank, kami endang naka ulih nguji meri servis ti pemadu manah ungkup pengelantang mensia mayuh.

Wan Hamzah Wan Masra

“Genap sebana ti dibantaika sida pasal ATM tu mega deka diputarka enggau lengkas. Arapka mensia mayuh besabar laban pengawa mutarka penanggul nya begunaka awak.

“Ambika chunto, lebuh maya mesin nya abis duit tentu begunaka awak jam ti panjai laban pejalai mai duit ari Sibu ukai ulih sejam dua. Pia mega, maya mesin rusak, kami begunaka awak ngiga juruteknik ari Kuching mutarka penanggul nya.

“Bekau ari mayuh sebana, Agrobank bisi suah agi datai ngisi duit ngagai ATM. Arapka penguna ditu ulih berundingka inisiatif diri ngelawa ATM Agrobank bukai baka di Lubok Antu tauka Sri Aman enti ATM bisi penanggul,”ku iya.

Suara Sarawak