Raban pengemeran industri kreatif terus dibantu

KUCHING: Sempekat Pemereti Ati (MoU) ungkup Program Pejalai Belanja Pekara Digital (DKD) entara Serakup Filem Nasional Malaysia (Finas) enggau Sarawak Media Group Sdn Bhd (SMG) udah mujur disain dikena nanggam agi pemanah kaul kededua raban nya bemacham projek bekaul.

Menteri Komunikasyen enggau Multimedia Malaysia, Saifuddin Abdullah madahka kedua raban tu benung bejalaika semilan iti projek ke ngena agih belanja sepenyampau RM2.9 juta.

“Finas enggau SMG deka bekerejasama dalam mayuh macham kategori projek baka ngaduka majalah, telemovie, drama besambung enggau pemerindang sereta mayuh macham agi projek bukai.

“Arapka inisiatif tu ulih dikena ngangkatka kualiti raban produksi sereta nulung raban industri kreatif lebih agi di Sabah enggau Sarawak maya pandemik Covid-19,” ku iya,

Iya madah munyi nya ba pengawa nyain MoU Program Pejalai Belanja Pekara Digital (DKD) entara Serakup Filem Nasional Malaysia (Finas) enggau Sarawak Media Group Sdn Bhd (SMG) nengah chara online, ensana.

Tandu iya, asil ari kaul kereja tu deka meri peransang ngagai raban pengemeran industri ngeluarka asil penemu ke bekualiti, ngemansangka modal mensia enggau reta intelik seni di Borneo baka Sabah enggau Sarawak.

Berebak enggau nya, insiatif Borneo Pitch ke udah dilancharka nengah pengawa meri Surat Bantu Belanja Borneo Pitch (Prisma DKD) iya nya siti pelin timpuh pandak pakej peransang industri kreatif Malaysia kena ngelantang ka chara operasi enggau ngurus bantu belanja bagi raban pemerindang di Sabah enggau Sarawak.

Pengawa tu udah nyengkaum nyerahka surat kangau ungkup orang ke nerima bantu belanja Prisma DKD dikena ngadu 16 iti projek kreatif baka filem, cherita, dokumentari enggau program TV/OTT.

Sama bisi enggau ngulu pengawa nya Chairman Finas Zakaria Abdul Hamid, Chairperson SMG, Datuk Norhyati Ismail, Sapit Tuai Sekretari (Komunikasyen Strategik enggau Industri Kreatif) KKMM Mastura Ahmad Mustafa; Sapit Tuai Sekretari KKMM, Ma. Sivanesan; Tuai Pegawai Eksekutif Finas Dr. Ahmad Idham Ahmad Nadzri enggau Tuai Pegawai Eksekutif SMG Suhaimi Sulaiman.

Suara Sarawak