Sapit Menteri Besai patut Kaban Parlimen ari Borneo

KUCHING: Kaban Parlimen (MP) ari Sarawak enggau Sabah (Borneo) patut dichiri nyadi Sapit Menteri Besai (TPM), ku Datuk Abdul Karim Rahman Hamzah.

Ku Karim, pangku pengawa nyadi Sapit Menteri Besai diatu patut diberi ngagai Kaban Parlimen ari Sarawak enggau Sabah.

Kebuah pia ku iya, kitai udah mayuh nyaup ngemansangka Malaysia nengah bemacham pemansut, ekonomi enggau negapka menua.

Nya kebuah ku Karim, pekara tu endang patut lalu rayat mesti sabar nganti penerang rasmi ari Yang di-Pertuan Agong pasal pengawa milih Menteri Besai.

Ku iya, kitai enda ibuh mantaika peragam pasal pekara tu laban Agong deka ngaga pemutus pasal sapa ke deka nyadi Menteri Besai Kesemilan pengudah nerima timbal ari semua Kaban Parlimen.

“Aku pechaya, Kaban Parlimen ngandalka chalun ti bepenau ngemudi Malaysia.

“Kitai patut nganti Agong mantaika pekara tu lalu pemutusti digaga nya mesti dipebasa semua orang.

“Kitai patut belajar ari penyarut ke nyadi entara tuai ba renggat Perintah Besai iya nya Perintah Besai mesti adil nyengkaum ngagai raban penyakal lalu genap raban politik mesti pintar enggau bejalaika pengawa nitihka pematut.

“Endang amat perintah ti mimit majoriti deka napi mayuh pemar enti sida semampai dikeruga.

“Ba penemu aku, sekalika ari perintah tauka penyakal, kitai patut iarka penemu ke bebida lalu bekerejasama mutarka penusah ditapi rayat enggau menua kelebih agi maya pandemik Covid-19 enggau ekonomi ke kusut.

“Aku ngasaika menua kitai deka napi penusah enti bisi orang deka ngerampas tauka ngubah perintah ke deka ditumbuh tu,” ku Karim.

Suara Sarawak